"Putinlə görüşə hazıram, amma təzyiq Ukraynaya yönəlir" - Zelenski

"ABŞ müharibəni tez bitirmək istəyir və Kiyevdən güzəştlər tələb edir..."

Ukrayna prezidenti Vladimir Zelenski bəyan edib ki, Ukrayna Rusiya ilə sülh danışıqlarına ciddi yanaşır və bu prosesin ən effektiv formatı liderlər səviyyəsində görüş ola bilər.

Moderator.az xəbər verir ki, bu barədə "Reuters" agentliyi məlumat yayıb. 

"Birbaşa danışıqlara hazırıq"

Zelenskinin sözlərinə görə, Kiyev Vladimir Putin ilə birbaşa görüşə hazırdır. O, vurğulayıb ki, Ukrayna danışıqdan qaçmır, əksinə, müharibənin bitməsi üçün real dialoq istəyir. Eyni zamanda, o qeyd edib ki, Moskva müharibənin ultimatum yolu ilə, yəni Ukrayna qoşunlarının Donetsk və Luqansk istiqamətlərindən çıxarılması ilə başa çatmasını istəyir.

ABŞ-dan təzyiq və mübahisəli şərtlər

Zelenskinin sözlərinə görə, Donald Tramp administrasiyası Ukraynaya təhlükəsizlik zəmanətlərini Donbasdan geri çəkilmə ilə əlaqələndirir. Yəni Vaşinqton faktiki olaraq müharibənin tez bitməsi üçün Kiyevdən ərazi güzəştləri gözləyir.

Ukrayna lideri xəbərdarlıq edib ki, bu cür addım təkcə ölkənin deyil, ümumilikdə Avropanın təhlükəsizliyini risk altına qoya bilər. Çünki bölgədəki güclü müdafiə mövqeləri Rusiyanın nəzarətinə keçəcək. Zelenski həmçinin qeyd edib ki, Yaxın Şərqdəki vəziyyət, xüsusilə İran ətrafında gərginlik Trampın qərarlarına təsir edir və ABŞ-ın diqqətini Ukraynadan yayındırır.

Putin müharibəni bitirmək istəyirmi?

Məqalədə vurğulanır ki, ABŞ və Ukrayna arasında ən ciddi fikir ayrılığı Vladimir Putinin niyyətləri ilə bağlıdır. Vaşinqton hesab edir ki, Putin müharibəni bitirmək istəyir. Kiyev isə bunun əksini düşünür və Rusiyanın real sülh niyyəti görmədiyini bildirir.
Zelenskinin sözlərinə görə, məhz buna görə Ukrayna tərəfi Rusiyaya qarşı daha güclü təzyiqin artırılmasını istəyir.

Hazırkı vəziyyət göstərir ki, tərəflər sülh danışıqlarına hazır olduqlarını desələr də, şərtlər və baxışlar ciddi şəkildə fərqlənir. ABŞ sürətli nəticə istəyir, Ukrayna isə təhlükəsizlik risklərini ön plana çəkir. Bu ziddiyyətlər aradan qalxmasa, danışıqların real nəticə verməsi çətin görünür.