"Trampın sərvəti rekord sürətlə artır" - "La Vanguardia" (İspaniya)

"ABŞ prezidenti biznes, siyasət və şəxsi maraqların kəsişməsində milyardlarla dollar qazanır..."

Donald Tramp ABŞ tarixində ən sürətlə varlanan prezidentə çevrilib. Onun ilk prezidentlik müddəti ərzində sərvəti ən azı 2,4 milyard dollar artıb.

Moderator.az xəbər verir ki, bu barədə İspaniyanın "La Vanguardia" nəşri yazıb.

Prezidentlik və sürətlə artan sərvət

Nəşr yazır ki, təkcə 2025-ci ildə Tramp ailəsi daha 1,4 milyard dollar varlanıb - bu, yalnız rəsmi gəlirlərin hesablanmasıdır. Hakimiyyətə gələndə artıq ən varlı prezident sayılan Tramp, ikinci müddətində bu göstəricini daha da artırmağı bacarıb. Bununla yanaşı, onun siyasəti onu hakimiyyətə gətirən sosial təbəqə ilə ziddiyyət təşkil etməyə başlayıb.

Vergi islahatları varlı təbəqənin xeyrinə dəyişdirilib, aşağı gəlirli vətəndaşlar üçün nəzərdə tutulan "Medicaid" proqramının maliyyəsi azaldılıb. 2025-ci ildə tibbi sığorta subsidiyalarının dayandırılması milyonlarla amerikalını sığortasız qoyub. Eyni zamanda idxal rüsumlarının artması qiymətləri yüksəldib: qəhvə 9,2 faiz, ət 6,2 faiz, meyvə 5,5 faiz bahalaşıb. Dövlət sektorunda 238 min iş yeri ixtisar olunub, işsizlik isə 4,4 faizə yüksəlib.

Biznes maraqları və siyasi qərarlar

Trampın fəaliyyəti tez-tez maraq toqquşması ittihamları ilə müşayiət olunur. Onun "Trump Organization" ailə şirkəti xaricdə daşınmaz əmlak layihələrindən gəlir əldə edir. Son bir ildə şirkət 23 milyon dollar qazanıb və bu vəsaitin böyük hissəsi xarici banklarda saxlanılır.

Tramp beynəlxalq arenada aktiv olduğu dövrdə onun ailə üzvləri Oman, Səudiyyə Ərəbistanı və Vyetnamda iri layihələri idarə edib. Məsələn, Vyetnamdakı layihə tamamlandıqdan dərhal sonra Vaşinqtonla Hanoy arasında rüsumların azaldılması barədə razılaşma imzalanıb.
Birinci xanım Melaniya Tramp da diqqətdən kənarda qalmayıb - "Amazon" onun haqqında sənədli film çəkmək hüququna görə 28 milyon dollar ödəyib.

Eyni zamanda, Trampın ikinci inauqurasiyasında texnologiya nəhənglərinin rəhbərlərinin - İlon Mask, Tim Kuk, Mark Zukerberq və Sem Altmanın ön sıralarda yer alması ABŞ-də “texnokratik oliqarxiya” müzakirələrini yenidən gündəmə gətirib.

Kriptovalyuta, məhkəmələr və qlobal əlaqələr

Tramp son illərdə məhkəmə proseslərindən də ciddi gəlir əldə edib. "X" (keçmiş "Twitter"), "Facebook" və "YouTube" ilə bağlı işlərdən, eləcə də "ABC News" və CBS ilə mübahisələrdən milyonlarla dollar kompensasiya qazanıb. Ən böyük qazanc isə öz adını daşıyan kriptovalyutadan gəlib. 

İnauqurasiyadan az əvvəl buraxılan "$Trump" tokeni ailəyə təxminən 867 milyon dollar qazandırıb. "World Liberty Financial" şirkəti vasitəsilə bu gəlirlər daha da artır. Xarici tərəfdaşlarla əlaqələr də diqqət çəkir. Məsələn, Qətər əmiri Tamim bin Həməd Əl Tani Trampa "Boeing 747-8" təyyarəsi hədiyyə edib, bundan sonra ABŞ-Qətər münasibətləri daha da yaxınlaşıb.

Bütün bu amillər göstərir ki, Trampın sərvəti yalnız biznesdən deyil, siyasət və şəxsi təsir imkanlarının kəsişməsindən formalaşır. Hətta "The New York Times" nəşri hesab edir ki, prezidentin illik gəliri orta hesabla 17 min amerikalı ailənin ümumi gəlirinə bərabərdir.