"Rusiya "Starlink"i itirdikdən sonra Ukrayna 400 kvadrat km ərazini geri alıb" - "The Wall Street Journal"

"Rabıtənin çökməsi cəbhədə tarazlığı dəyişib..."

Rusiyanın "Starlink" sisteminə çıxışını itirməsi cəbhədə ciddi dönüş yaradıb və Ukraynaya son iki ilin ən böyük irəliləyişlərindən birini əldə etməyə imkan verib.

Moderator.az xəbər verir ki, bu barədə "The Wall Street Journal" nəşri yazıb. 

Gözlənilməz dönüş və sürətli irəliləyiş

Fevral ayında "SpaceX" tərəfindən tətbiq edilən məhdudiyyətlər nəticəsində Ukrayna təsdiqlənmiş çıxış əldə edib, Rusiya qüvvələri isə sistemdən kənarda qalıb. Bu dəyişiklik dərhal döyüş meydanında hiss olunub.
Ukraynalı hərbçilərin sözlərinə görə, rabitənin itirilməsi rus ordusunu faktiki olaraq "soyuq müharibə dövrünün səviyyəsinə" qaytarıb. 

Nəticədə Ukrayna qüvvələri Zaporojye və Dnepropetrovsk istiqamətlərində təxminən 400 kvadrat kilometrədək ərazini geri qaytara bilib. Ən ciddi zərbə isə pilotsuz aparatların effektivliyinə dəyib. Əvvəllər hədəf aşkar edilən kimi dərhal zərbə endirilirdisə, indi koordinasiya gecikir və bu, Ukrayna üçün kritik üstünlük yaradır.

Rabitə boşluğu və xaos

"Starlink"i itirən Rusiya ordusu radio rabitəsinə keçməyə məcbur olub. Ukrayna qüvvələri isə bu siqnalları aktiv şəkildə ələ keçirərək düşmənin planlarını əvvəlcədən öyrənə bilib.

Bu vəziyyət Ukraynaya kiçik qruplarla arxa cəbhəyə sızaraq əks-hücumlar həyata keçirmək imkanı verib. 

Komandirlər qeyd edir ki, Rusiya bölmələri arasında əlaqə zəiflədiyindən koordinasiya ciddi şəkildə pozulub. Eyni zamanda, "Starlink" yalnız rabitə deyil, həm də bölmələr üzərində nəzarət vasitəsi idi. Onun itirilməsi rus əsgərlərinin tez-tez təcrid olunmuş şəkildə hərəkət etməsinə və ümumi vəziyyəti anlamamasına səbəb olub.

Alternativlər və məhdud imkanlar

Rusiya tərəfi vəziyyəti bərpa etmək üçün müxtəlif üsullara əl atır: mövqelər arasında kabel xətləri çəkilir, lokal şəbəkələr qurulur və alternativ peyk xidmətləri axtarılır. Lakin ekspert Maykl Kofmanın sözlərinə görə, bunların heç biri "Starlink" qədər effektiv deyil. Ukrayna tərəfinin qiymətləndirməsinə görə, rus ordusunun koordinasiya qabiliyyəti yalnız qismən - təxminən 60 faiz səviyyəsində bərpa olunub.

Üstəlik, daxildə kommunikasiya vasitələri ilə bağlı fikir ayrılıqları da qalır: "Telegram"ın məhdudlaşdırılması və dövlət sistemlərinə etimadsızlıq vəziyyəti daha da çətinləşdirir. Nəticə də, Rusiya say üstünlüyünü qorusa da, rabitə böhranı cəbhədə ciddi boşluqlar yaradıb. Ukrayna isə bu fürsətdən istifadə edərək uzunmüddətli durğunluqdan sonra mühüm taktiki irəliləyiş əldə edib.