"Ukrayna taktikanı dəyişdi: Rusiya üçün yeni problemlər yaranır" - ISW

"Ukrayna ordusunun yeni yanaşması həm cəbhədə, həm də arxa zonada Moskvanın imkanlarını zəiflədir..."

Amerikanın Müharibənin Öyrənilməsi Institutunun (ISW) analitikləri bildirir ki, 2026-cı ildən etibarən Ukrayna Silahlı Qüvvələri zərbə taktikasını ciddi şəkildə dəyişib.

Moderator.az xəbər verir ki, bu barədə "rbc.ua" nəşri yazıb.

Dəyişən taktika və artan təzyiq

Analitiklər qeyd edir ki, artıq əsas diqqət rus piyada qüvvələrinə deyil, artilleriya, dron operatorları və logistika hədəflərinə yönəldilir.
Bu yanaşma cəbhənin yaxın arxa hissəsində Rusiya qüvvələrinin əlaqəsini və koordinasiyasını pozur, hücumların intensivliyini azaldır və Ukraynaya lokal üstünlüklər qazandırır. Xüsusilə rabitə antenalarına və idarəetmə nöqtələrinə zərbələr rus qüvvələrinin döyüş qabiliyyətini zəiflədir.

Arxa cəbhəyə zərbələr və sistemli zəiflətmə

ISW qeyd edir ki, Ukrayna yalnız yaxın məsafədə deyil, orta və uzaq məsafələrdə də sistemli zərbələr həyata keçirir. Son aylarda 50-250 km aralığında zərbələrin sayı bir neçə dəfə artıb. Bu zərbələr əsasən Rusiyanın HHM sistemlərinə - radarlar, buraxılış qurğuları və digər vacib obyektlərə yönəlir. Nəticədə Ukrayna əvvəlcə müdafiə sistemlərini zəiflədir, daha sonra isə arxa cəbhədəki digər strateji hədəflərə daha effektiv zərbələr endirə bilir.

Rusiyanın imkanları məhdudlaşır

Analitiklər hesab edir ki, bu taktika Rusiyanın həm hücum, həm də müdafiə potensialını zəiflədir və 2026-cı ilin gözlənilən yaz-yay hücumu üçün hazırlıqları çətinləşdirir. Beləliklə, Ukraynanın döyüş yanaşmasındakı bu dəyişiklik yalnız cəbhədə deyil, ümumi strateji balansda da Rusiyanın mövqeyinə getdikcə daha ciddi təsir göstərir.