"Putin Kremlə çıxışlarını azaldıb: səbəb Xameneinin izlənərək məhv edilməsidir" -  "Financial Times"

"İsrail və ABŞ əməliyyatının detalları Moskvada narahatlıq yaradıb..."

Rusiya prezidenti Vladimir Putin son günlər Kremlində açıq tədbirlərdə nadir görünməyə başlayıb. 

Moderator.az xəbər verir ki, bu barədə "Financial Times" nəşri yazıb.

Nəşr yazır ki, bu dəyişiklik ABŞ və İsrailin İranın ali lideri Əli Xameneinin izlənərək məhv edilməsi ilə bağlı yayılan məlumatlardan sonra baş verib.

Məlumatlara görə, Putin sonuncu dəfə martın 9-da Kremldə ictimai tədbir keçirib. Bundan sonra isə yalnız videobağlantı ilə müşavirələrdə iştirak etdiyi bildirilir. Analitiklər qeyd edir ki, bu cür format prezidentin müxtəlif iqamətgahlardan işləməsinə imkan verir və təhlükəsizlik baxımından daha çevik sayılır.

İzləmə texnologiyaları və təhlükəsizlik narahatlığı

Nəşr yazır ki, İsrail xüsusi xidmət orqanları Əli Xameneinin hərəkətlərini Tehrandakı sındırılmış müşahidə kameraları vasitəsilə izləyib. Bu kameralar illərlə məlumat ötürərək İranın təhlükəsizlik sistemini detallı şəkildə öyrənməyə imkan verib. Hücumdan əvvəl isə mobil rabitə qəsdən sıradan çıxarılıb ki, mühafizəçilər arasında əlaqə pozulsun.

Bu məlumatlar Moskvada ciddi narahatlıq doğurub. Çünki şəhərdə müşahidə kameralarının sayı daha çoxdur və son günlər mərkəzdə mobil internetin kəsilməsi halları artıb. Bəzi rusiyalı ekspertlər bu addımların mümkün təhlükələrlə əlaqəli ola biləcəyini iddia edir.

İran daxilində destabilizasiya ssenarisi

"The Wall Street Journal" qeyd edir ki, İsrail hazırda İran rejimini daxildən zəiflətmək strategiyasına üstünlük verir. Bu çərçivədə yerli mənbələrdən alınan kəşfiyyat məlumatları əsasında yüksək rütbəli şəxslər hədəfə alınır.

Məlumata görə, son əməliyyatlardan birində İran Təhlükəsizlik Şurasının katibi Əli Laricani öldürülüb. Bundan əlavə, İsrail tərəfi kəşfiyyat naziri İsmayıl Xatib də daxil olmaqla, minlərlə təhlükəsizlik əməkdaşının zərərsizləşdirildiyini iddia edir.

Nəticədə bu hadisələr təkcə İran daxilində deyil, digər ölkələrdə də təhlükəsizlik yanaşmalarının yenidən nəzərdən keçirilməsinə səbəb olub. Xüsusilə Vladimir Putinin davranışındakı dəyişikliklər bu risklərin nə qədər ciddi qəbul edildiyini göstərir.