ABŞ İrana ən yaxın ərazidə "F-35A" qırıcı təyyarələr eskadrilyası yerləşdirdi

ABŞ Hərbi Hava Qüvvələri Səudiyyə Ərəbistanındakı Şahzadə Sultan aviabazasına 10 ədəd beşinci nəsil "F-35A Lightning II" stels-qırıcı təyyarələrindən ibarət eskadrilya yerləşdirib.

Bu barədə Moderator.az "Military Air Tracking Alliance" (Hərbi Hava İzləmə Alyansı - MATA) məlumatlarına istinadən xəbər verir.

İndi bura ABŞ döyüş aviasiyasının İrana ən yaxın yerləşdirildiyi obyektdir.

Ötən bazar günü qırıcılar yanacaqdoldurma təyyarələrinin dəstəyi ilə ABŞ-dən trans-Atlantik uçuşdan sonra Böyük Britaniyadakı Leykenhit aviabazasına çatıblar, oradan da martın 16-da Yaxın Şərqə yola düşüblər.

Şahzadə Sultan aviabazasında artıq ABŞ-nin altı ədəd "E-3C Sentry AWACS" uzaqdan radiolokasiya aşkarlayıcı və idarəetmə təyyarəsi, döyüş əməliyyatları şərtlərində qoşunlarla rabitəni təmin etmək üçün nəzərdə tutulmuş yeddi ədəd "E-11A BACN" rabitə retranslyatoru təyyarəsi, eləcə də yanacaqdolduran təyyarələr yerləşdirilib.

Yaxın Şərqdəki ABŞ taktiki aviasiya qruplaşmasının hazırda 250-dən çox təyyarəsi var. Onun ən böyük mərkəzi İordaniyadakı "Muvaffaq Salti" aviabazasıdır ki, burada "F-35A", "F-15E", "F-16" və "A-10" da daxil olmaqla, çoxsaylı eskadrilyalar yerləşdirilib.