Tramp: "ABŞ İranın raket və PUA zavodlarına zərbələr endirib, yüzlərlə hərbi gəmi məhv edilib"

"ABŞ hərbi qüvvələri İranın raket və pilotsuz uçuş aparatı (PUA) istehsalı ilə əlaqəli hərbi-sənaye kompleksinin üç obyektinə zərbələr endirib".

Moderator.az "İzvestiya" nəşrinə istinadən xəbər verir ki, bu barədə ABŞ Prezidenti Donald Tramp Tramp-Kennedi Mərkəzinin Direktorlar Şurası ilə keçirilən nahar zamanı bildirib.

"Onların artıq o qədər də çox raketi qalmayıb. Biz həmçinin onların raket və PUA istehsal etdikləri fabriklərə hücum etdik və bu proses bu gün də davam edir. Bu gün onlardan yalnız üçünü vurduq", - deyə o vurğulayıb.

Tramp həmçinin qeyd edib ki, münaqişənin əvvəlindən ABŞ qüvvələri İranda əsasən kommersiya və hərbi xarakterli yeddi mindən çox hədəfə zərbə endirib. Onun sözlərinə görə, bu əməliyyatlar nəticəsində İranın ballistik raket buraxılışlarının sayı 90 %, PUA hücumlarının sayı isə 95 % azalıb.

ABŞ prezidentinin sözlərinə görə, Amerika qüvvələri İranın Hörmüz boğazını bloklamaq üçün istifadə oluna biləcək 30-dan çox mina gəmisini məhv edib. O, İranın boğazı minalamaq üçün hər hansı cəhdinin ağır nəticələrə səbəb olacağı barədə xəbərdarlıq edib.

"Biz onların bütün mina gəmilərini vurduq. Əgər boğaza minalar yerləşdirsələr, bu, onlar üçün çox pis olacaq. Bu, intihar addımıdır", - deyə Tramp bildirib.

Ağ Evin rəhbəri əlavə edib ki, son bir həftə yarım ərzində İranın 100-dən çox hərbi dəniz gəmisi batırılıb və ya məhv edilib. O həmçinin ABŞ ordusunun Xark adasını tamamilə dağıtdığını iddia edib.