"Ukraynanın dronlara qarşı texnologiyası qlobal diqqət mərkəzində" - "The Wall Street Journal"

"Yaxın Şərqdə artan hücumlar fonunda ABŞ və müttəfiqləri Ukraynanın təcrübəsinə üz tutur..."

Yaxın Şərqdə artan gərginlik və İran dronlarının geniş istifadəsi Ukraynanın pilotsuz aparatlara qarşı hazırladığı texnologiyalara marağı artırıb.

Moderator.az xəbər verir ki, bu barədə "wsj.com" nəşri yazıb.

Yaxın Şərq müharibəsi yeni texnologiyalara tələbat yaradıb

ABŞ, Körfəz ölkələri və İsrail ucuz və effektiv müdafiə sistemləri axtararkən Ukraynanın müharibə zamanı topladığı təcrübəyə üz tutur. İran istehsalı olan "Shahed" dronlarının qiyməti təxminən 20-50 min dollar təşkil edir. 

Lakin onları vurmaq üçün istifadə edilən bəzi HHM raketləri milyonlarla dollara başa gəlir. Bu isə uzunmüddətli hücumlar zamanı ən güclü hava hücumundan müdafiə sistemlərinin belə bahalı raket ehtiyatlarını tez tükətməsi riskini yaradır.

Ukrayna müharibə şəraitində yeni müdafiə modeli qurub

Rusiya Ukraynaya qarşı müharibə ərzində on minlərlə "Shahed" dronundan istifadə edib. Bu səbəbdən Kiyev klassik HHM sistemlərinə əlavə olaraq yeni müdafiə üsulları yaratmağa məcbur olub.

Ukrayna çoxsəviyyəli müdafiə sistemi formalaşdırıb: radar müşahidəsi, radioelektron mübarizə vasitələri və mobil HHM qrupları birlikdə fəaliyyət göstərir. Bu qruplar bəzən pulemyot və zenit silahları ilə aşağıdan uçan dronları məhv edir.

Eyni zamanda Ukraynalı mühəndislər digər pilotsuz aparatları havada məhv edən xüsusi "dron-tutucu" sistemlər hazırlayıblar. Bu texnologiyalar müharibə şəraitində sürətlə inkişaf etdirilib və nisbətən ucuz alternativ kimi diqqət çəkib.

Dünya Ukraynanın təcrübəsini öyrənir

Yaxın Şərqdə müharibənin uzanması fonunda ABŞ və Körfəz ölkələri Ukraynanın bu təcrübəsini aktiv şəkildə öyrənir. Artıq bəzi ölkələr interceptor dronları sifariş edir və ya Ukrayna texnologiyalarına əsaslanan layihələr üzərində işləyir.

Ukrayna prezidenti Vladimir Zelenski də bildirib ki, müasir müharibədə dron hücumlarına qarşı ən effektiv vasitələrdən biri məhz dron-tutucu texnologiyalardır və bu sahədə Ukraynanın topladığı təcrübə bir çox ölkə üçün mühüm əhəmiyyət daşıyır.