"Putinin paranoyası: Soçi iqamətgahı ətrafında üç kvadrat kilometrlik təhlükəsizlik zonası yaradılır" - "Aгентство. Новости"

"Prezident iqamətgahı ətrafında dron uçuşları, su nəqliyyatı və ictimai fəaliyyətlər ciddi məhdudlaşdırılacaq..."

Rusiyanın Federal Mühafizə Xidməti prezident Vladimir Putinin Soçidə yerləşən məşhur "Boçarov Ruçey" iqamətgahı ətrafında geniş mühafizə zonası yaratmağı planlaşdırır. 

Moderator.az xəbər verir ki, bu barədə "Агентство. Новости" agentliyi məlumat yayıb.

Soçidə yeni təhlükəsizlik zonası yaradılır

Məlumatda deyilir ki, hazırlanan layihəyə əsasən, bu zona üç kvadrat kilometrdən artıq ərazini əhatə edəcək və yalnız quru sahəsini deyil, Qara dənizin bir hissəsini də daxil edəcək.
Planlaşdırılan qaydalara görə, ərazidə bir sıra fəaliyyətlər tamamilə qadağan olunacaq. Buraya helikopter meydançalarının tikintisi, avtomobil və motosikletlərin təmiri, heyvan saxlanılması və müxtəlif obyektlərin tikintisi daxildir.

Bundan başqa, ərazidə iri banner və ya plakatların yerləşdirilməsi də yasaqlanacaq. Yeni qaydalar dronlara da şamil edilir. Təhlükəsizlik zonasında çəkisindən asılı olmayaraq bütün pilotsuz uçuş aparatlarının uçuşu qadağan ediləcək. Eyni zamanda, sahil xətti boyunca su nəqliyyat vasitələrinin dayanmasına da icazə verilməyəcək, yalnız kiçik bir sahədə istisna tətbiq oluna bilər.

Məhdudiyyətlərin siyahısı genişdir

Layihədə nəzərdə tutulan qadağalar təkcə texniki obyektlərlə məhdudlaşmır. Məsələn, məktəblər və ya təşkilatlar silaha bənzər predmetlərdən istifadə edərsə, onların fəaliyyəti də bu zonada məhdudlaşdırıla bilər. Bundan əlavə, atıcılıq klubları, peynbol və ya airsoft mərkəzləri kimi fəaliyyət növlərinin də yaradılması qadağan ediləcək.

Eyni zamanda, zibil poliqonlarının təşkili və digər infrastruktur layihələri də bu ərazidə mümkün olmayacaq. Rusiya xüsusi xidmətləri bildirir ki, ərazidə yaşayan və ya işləyən şəxslərin hüquqları məhdudlaşarsa, onlara kompensasiya ödənilə bilər. Bu təşəbbüs təkcə "Boçarov Ruçey" ilə məhdudlaşmır. Oxşar mühafizə zonalarının Soçidə daha bir neçə obyekt ətrafında və hökumət bağının yerləşdiyi Kislovodsk şəhərində də yaradılması nəzərdə tutulur.

İqamətgah və təhlükəsizlik mübahisələri

"Boçarov Ruçey" 1991-ci ildən etibarən Rusiya prezidentinin rəsmi iqamətgahlarından biri hesab olunur. Vladimir Putin uzun illər burada xarici liderləri qəbul edib və müdafiə rəhbərliyi ilə müşavirələr keçirib. Məsələn, ABŞ-ın keçmiş prezidenti Corc Buşla görüş də məhz bu iqamətgahda baş tutub. 2024-cü ilin əvvəlində iqamətgahın əsas binası sökülərək yerində yeni tikinti işlərinə başlanıb.

Bu isə kompleksin yenidən qurulması ilə bağlı ehtimalları gücləndirib. Son aylarda isə Soçi regionunda pilotsuz aparat hücumları ilə bağlı xəbərlər fonunda təhlükəsizlik məsələləri daha çox müzakirə olunur. Bu səbəbdən də Rusiya xüsusi xidmətlərinin prezident iqamətgahları ətrafında daha geniş mühafizə zonaları yaratmaq planı diqqət mərkəzinə düşüb.