"Mers Trampa qarşı: Almaniya İranda "sonsuz savaş"dan narahatdır" - "Deutsche Welle"

"Mers İran müharibəsinin diplomatik yolla bitirilməsinə çağırır..."

Almaniya kansleri uzanan münaqişənin Avropanın təhlükəsizliyi, enerji qiymətləri və miqrasiya vəziyyəti üçün ciddi risklər yaratdığı barədə xəbərdarlıq edib.

Moderator.az xəbər verir ki, bu barədə "dw.com" nəşri yazıb.

Berlin diplomatik çıxış yolu axtarır

Kansler bildirib ki, Berlin münaqişənin tezliklə bitməsi üçün bütün diplomatik kanallardan istifadə edir. Mers Norveçdə keçirdiyi mətbuat konfransında qeyd edib ki, uzanan müharibə Avropanın təhlükəsizliyinə və iqtisadi maraqlarına birbaşa təsir göstərir. Kanslerin sözlərinə görə, xüsusilə enerji bazarındakı gərginlik və regionda eskalasiya Avropa üçün ciddi risklər yaradır.

Vaşinqtonun strategiyası ilə bağlı narahatlıq

"Politico" nəşri yazır ki, Mers əvvəlcə ABŞ prezidenti Donald Tramp administrasiyasının İranla bağlı hərbi məqsədlərinə daha açıq dəstək verirdi. Lakin müharibənin uzanması və iqtisadi nəticələrin ağırlaşması fonunda Almaniya hökumətinin mövqeyi daha ehtiyatlı tona keçib.

Kansler bildirib ki, müharibə enerji qiymətlərinə güclü təsir göstərir və eyni zamanda yeni miqrasiya dalğasına səbəb ola bilər. O, həmçinin ABŞ və İsrailin hərbi əməliyyatlarının necə və nə vaxt başa çatacağı ilə bağlı aydın strategiyanın olmamasından narahat olduğunu qeyd edib.

"Sonsuz müharibə" riski

Mers xəbərdarlıq edib ki, İran ətrafında münaqişənin uzanması regionda daha geniş destabilizasiyaya səbəb ola bilər. Onun sözlərinə görə, əgər İranın dövlət strukturları zəifləsə və ya ölkə iqtisadi baxımdan iflic vəziyyətə düşsə, bunun nəticələri Avropa üçün də ciddi olacaq. 

Kansler həmçinin ABŞ administrasiyasının Rusiya neftinə qarşı bəzi sanksiyaları yumşaltmaq qərarını tənqid edərək bunu "səhv addım" adlandırıb. Onun fikrincə, belə qərarlar Moskvanın müharibə büdcəsini artıraraq Ukraynaya qarşı hərbi əməliyyatların davam etməsinə kömək edə bilər.

Mers vurğulayıb ki, Almaniya bu müharibənin tərəfi deyil və Berlinin əsas məqsədi münaqişənin mümkün qədər tez diplomatik yolla dayandırılmasına nail olmaqdır.