"Ukraynada atəşkəsə bu gün də nail olmaq olar" - Kelloq

"Hazırkı danışıqların tam sülh sazişi ilə nəticələnməsi hələ ki çətin görünür..."

ABŞ prezidenti Donald Trampın keçmiş xüsusi nümayəndəsi Kit Kelloq hesab edir ki, Ukraynada atəşkəs hətta "bu gün" də mümkündür.

Moderator.az xəbər verir ki, bu barədə "24tv.ua" nəşri yazıb.

Atəşkəs üçün əsas şərt: yeni ərazilər olmayacaq

Onun sözlərinə görə, bunun üçün əsas şərt tərəflərin mövcud cəbhə xəttini dondurması və xüsusilə də Vladimir Putinin artıq əlavə Ukrayna əraziləri əldə edə bilməyəcəyini qəbul etməsidir.

Kelloq bildirib ki, müharibənin dayanmasının qarşısında duran əsas maneələrdən biri də Donbas məsələsidir. Vladimir Zelenski rəhbərliyindəki Ukrayna bu ərazidən imtina etməyə hazır deyil, Rusiya isə Ukrayna qoşunlarının oradan çıxmasını tələb edir.

ABŞ rəsmisinin sözlərinə görə, Rusiyaya qarşı tətbiq edilən sanksiyalar ölkə iqtisadiyyatına ciddi zərbə vurur. O həmçinin qeyd edib ki, müharibə zamanı Rusiya ordusunun itkiləri öldürülən və yaralananlar daxil olmaqla təxminən 1,2-1,4 milyon nəfərə çata bilər.

Müharibənin sonu üçün iki əsas ssenari

Türkiyəli beynəlxalq münasibətlər üzrə analitik, istefada olan polkovnik Canfer Balçik isə hesab edir ki, hazırkı danışıqların yaxın zamanda tam sülh sazişi ilə nəticələnməsi ehtimalı aşağıdır.

Onun fikrincə, daha real görünən iki ssenari var. Birincisi "dondurulmuş münaqişə" modelidir, yəni müharibə formal olaraq dayandırılır, lakin siyasi həll tapılmadığı üçün qarşıdurma uzun müddət həll olunmamış qalır. İkinci ssenari isə tərəflərin atəşkəs elan etməsi və faktiki olaraq mövcud cəbhə xəttinin sabitləşdirilməsidir.

Ekspert qeyd edir ki, bu danışıqlar yalnız Ukrayna və Rusiya arasında müharibənin taleyini deyil, həm də Qara dəniz regionu və bütövlükdə Avropanın gələcək təhlükəsizlik arxitekturasını müəyyən edə bilər.

Yeni danışıqlar və mümkün irəliləyiş

Ukrayna prezidenti Vladimir Zelenski yaxın günlərdə Ukrayna, ABŞ və Rusiya arasında yeni üçtərəfli danışıqların keçirilə biləcəyini bildirib. Onun sözlərinə görə, görüşün İsveçrə və ya Türkiyədə baş tutması mümkündür.

ABŞ prezidentinin xüsusi nümayəndəsi Stiv Uitkoff isə müharibədən yaranan yorğunluğun tərəfləri kompromisə yaxınlaşdıra biləcəyini və yaxın həftələrdə danışıqlarda əlavə irəliləyişin mümkün olduğunu deyib. Onun sözlərinə görə, tərəflər artıq minlərlə hərbi əsirin mübadiləsini həyata keçiriblər və dialoq davam edir.