"Yaxın Şərqə ukraynalı hərbi ekspertlər göndəriləcək" - Zelenski

"Ukrayna həm Yaxın Şərqə hərbi ekspertlər göndərməyə hazırlaşır, həm də cəbhədəki hərbçilərin həyatını qorumaq üçün Niderland radarlarına ehtiyac duyur..."

Ukrayna prezidenti Vladimir Zelenski bildirib ki, ölkəsi Yaxın Şərqdəki tərəfdaşlara kömək etmək üçün hərbi mütəxəssislər göndərməyə hazırlaşır. 

Moderator.az xəbər verir ki, o bu barədə Kiyevdə Niderlandın baş naziri Rob Yetten ilə keçirdiyi birgə mətbuat konfransında danışıb. Məlumatı "oboz.ua" nəşri yayıb.

Nəşrin yazdığına görə, Kiyev bir tərəfdən Fars körfəzi ölkələrinə hərbi ekspertlər göndərməyi planlaşdırır, digər tərəfdən isə cəbhədəki hərbçilərin həyatını qorumaq üçün Niderlanddan əlavə radar sistemləri istəyir. Zelenski bildirib ki, tərəflər Yaxın Şərqdəki müharibənin yaratdığı təhlükələri və xüsusilə Körfəz ölkələrinə edilən hücumların mümkün nəticələrini müzakirə ediblər.

Onun sözlərinə görə, Ukrayna son illərdə hava hücumlarından müdafiə və pilotsuz aparatlara qarşı mübarizə sahəsində böyük təcrübə toplayıb və bu bilikləri tərəfdaş ölkələrlə bölüşməyə hazırdır. Zelenski qeyd edib ki, yaxın günlərdə ukraynalı ekspertlər regiona gedərək vəziyyəti yerində qiymətləndirəcək və mülki əhalinin qorunması üçün tövsiyələr verəcəklər.

Cəbhədə radar çatışmazlığı

Prezident eyni zamanda bildirib ki, Ukrayna ordusunun cəbhədə əlavə radar sistemlərinə ciddi ehtiyacı var. O qeyd edib ki, Donetsk vilayətinin Drujkovka şəhərində hərbçilərlə görüş zamanı bu barədə konkret müraciət alıb. Zelenskinin sözlərinə görə, radarlar döyüş meydanında hərbçilərin həyatını qorumaq üçün vacibdir və Niderland bu sahədə ən güclü istehsalçılardan biridir.

O əlavə edib ki, bu məsələni şəxsən Niderlandın baş naziri ilə müzakirə edib və Ukrayna Silahlı Qüvvələrinin xahişini ona çatdırıb.
Prezident həmçinin xatırladıb ki, Niderland Ukraynaya hər il təxminən 3 milyard avro həcmində hərbi yardım göstərməyi planlaşdırır və "Patriot" HHM sistemləri üçün PAC-2 və PAC-3 raketlərinin alınmasına da dəstək verir.

Cəbhədə yeni təhlükələr

Zelenski əlavə edib ki, Ukrayna artıq bəzi silahların Niderlandla birlikdə istehsalına başlayıb və bu əməkdaşlıq gələcəkdə daha da genişləndiriləcək. Məlumata görə, prezident martın 6-da Donetsk vilayətinə səfər edərək cəbhədə vəziyyətlə tanış olub və Rusiya qüvvələrinin yaz hücumuna hazırlaşdığını bildirib. Bu arada Niderlandın yeni hökuməti Ukraynaya hərbi dəstəyin davam etdiriləcəyini açıqlayıb və 2029-cu ilə qədər hər il 3 milyard avro yardım göstərməyi planlaşdırır.