"Ukraynanın dronlarla mübarizə təcrübəsi Yaxın Şərq müharibəsində ümid yaradır" - CNN

"Ukraynanın "Shahed" pilotsuz aparatlarına qarşı yaratdığı müdafiə sistemi ABŞ və Yaxın Şərq ölkələri üçün mühüm dərslər verə bilər..."

ABŞ və İsrailin İrana qarşı əməliyyatları fonunda dron hücumları Yaxın Şərqdə təhlükəsizlik üçün əsas problemlərdən birinə çevrilib.

Moderator.az xəbər verir ki, bu barədə CNN nəşri yazıb.

Qeyd edilir ki, bu şəraitdə Ukraynanın uzun illər ərzində topladığı təcrübə region ölkələri üçün xüsusi əhəmiyyət qazanır.
Ukrayna rəsmiləri bildirir ki, onlar İrana məxsus "Shahed" kamikadze dronları ilə mübarizə sahəsində əldə etdikləri təcrübəni Yaxın Şərq dövlətləri və müttəfiqlərlə bölüşməyə hazırdırlar. Müharibə zamanı Ukrayna bu dronlara qarşı çoxpilləli müdafiə sistemi formalaşdırıb və Rusiyanın kütləvi pilotsuz aparat hücumlarına qarşı müəyyən uğurlar əldə etdiyini iddia edir.

ABŞ üçün "çatıb-ötmə yarışı"

Bəzi hərbi ekspertlərin fikrincə, ABŞ və onun müttəfiqləri "Şahed" təhlükəsinə qarşı mübarizədə hələ də "tut-qaç" vəziyyətindədir. Analitik Dara Massiko bildirir ki, Ukraynanın istifadə etdiyi ucuz və effektiv müdafiə üsulları hələ də ABŞ ordusu və ya Fars körfəzi ölkələri tərəfindən geniş şəkildə tətbiq olunmur.

Onun sözlərinə görə, İran yüzlərlə dron buraxaraq İsrailin və ABŞ-ın HHM sistemlərini yükləməyə və regiondakı strateji obyektlərə zərbə endirməyə çalışır. Bu aparatların əksəriyyəti məhv edilsə də, onların qarşısını almaq böyük resurs, daimi patrul uçuşları və raketdən müdafiə sistemlərinin intensiv istifadəsini tələb edir.

Ukraynanın çoxpilləli müdafiə modeli

CNN qeyd edir ki, Ukraynanın dronlara qarşı qurduğu müdafiə sistemi müxtəlif vasitələrin birgə istifadəsinə əsaslanır. Helikopterlər və pulemyotlarla təchiz edilmiş yenidən qurulmuş yük təyyarələri dronları havada izləyir, yerüstü mövqelərdə isə ağır pulemyotlardan istifadə edən HHM qrupları fəaliyyət göstərir.

Bundan əlavə, Ukrayna pilotsuz aparatları portativ zenit-raket kompleksləri ilə vurur, daha yüksək səviyyədə isə qırıcı təyyarələr və ABŞ tərəfindən verilmiş "Patriot" hava hücumundan müdafiə sistemi kompleksləri tətbiq olunur. ABŞ ordusu artıq Ukraynada sınaqdan keçmiş bəzi antidron sistemlərini Yaxın Şərqə göndərməyə başlayıb.

Yaxın Şərq müharibəsinin Ukraynaya təsiri

Eyni zamanda bəzi siyasətçilər hesab edir ki, Yaxın Şərqdəki münaqişə Ukraynadakı müharibəyə də təsir göstərə bilər. Finlandiya prezidenti Aleksandr Stubb bildirib ki, əgər Ukrayna müharibənin əvvəlində Fars körfəzi ölkələrində olduğu kimi güclü HHM sistemi əldə etsəydi, münaqişə daha tez başa çata bilərdi.

Onun sözlərinə görə, Yaxın Şərqdə müharibənin ilk həftəsi təxminən 40 milyard dollara başa gəlib ki, bu da Avropa ölkələrinin Ukraynaya illik yardım xərcləri ilə müqayisə oluna bilər. Stubb hesab edir ki, ABŞ və İsrailin İrana qarşı əməliyyatları nəticəsində Tehranla Moskva arasında hərbi əməkdaşlıq müvəqqəti zəifləyə bilər.

Bununla belə, o qeyd edib ki, Rusiyada artıq İran texnologiyası əsasında "Shahed" dronları istehsal edən zavodlar fəaliyyət göstərir və neft qiymətlərinin artması Moskvanın hərbi imkanlarını daha da gücləndirə bilər.