"Epşteyn faylları yenidən qalmaqal yaratdı: Tramp və Britaniya şahzadəsinin adları gündəmdə" - "The İnsider"

"ABŞ Ədliyyə Nazirliyinin açıqladığı yeni sənədlər qalmaqallı Epşteyn işi ətrafında yeni ittihamlar və sensasiyalı iddiaları gündəmə gətirib...:

ABŞ Ədliyyə Nazirliyi maliyyəçi Ceffri Epşteyn haqqında istintaq çərçivəsində FTB tərəfindən toplanmış və əvvəllər dərc olunmamış bir sıra materialları açıqlayıb.

Moderator.az xəbər verir ki, bu barədə "The İnsider" nəşri yazıb.

Yeni sənədlər və Trampa yönələn ittihamlar

Martın 5-də yayımlanan bu sənədlərdə ABŞ prezidenti Donald Tramp barədə də ittihamlar yer alır. FTB materiallarına əsasən, 2019-cu ildə istintaq çərçivəsində adı açıqlanmayan bir qadın dörd dəfə dindirilib. O bildirib ki, yeniyetmə yaşlarında Epşteyn tərəfindən seksual istismara məruz qalıb. 

Yeni açıqlanan sənədlərdə isə qadın əlavə iddialar irəli sürərək qeyd edib ki, 1980-ci illərdə - 13-15 yaşlarında olarkən Epşteyn onu Tramp ilə tanış edib və həmin görüş zamanı Trampın ona qarşı seksual xarakterli təzyiq göstərdiyini iddia edib.

Lakin "Reuters" agentliyi bu iddiaların müstəqil şəkildə təsdiqlənmədiyini vurğulayır. Ağ Ev isə açıqlamaya cavab olaraq ittihamları "tamamilə əsassız və heç bir etibarlı sübutla təsdiqlənməyən iddialar" adlandırıb. ABŞ Ədliyyə Nazirliyi də sənədlərin bir hissəsində "doğruluğu sübuta yetirilməmiş və sensasion xarakter daşıyan bəyanatlar" ola biləcəyi barədə xəbərdarlıq edib.

Sənədlərin açıqlanması həm də siyasi mübahisələrin fonunda baş verib. Demokratlar administrasiyanı prezidentlə bağlı materialları gizlətməkdə ittiham edir və Konqresdə məsələ ilə bağlı izahat tələb olunur. Daha əvvəl yayımlanan sənədlərdə Trampın 1990-cı illərdə Epşteynin şəxsi təyyarəsi ilə bir neçə dəfə uçuş etdiyi qeyd olunub, lakin Tramp bunu inkar edib və Epşteynlə əlaqələri 2000-ci illərin ortalarında kəsdiyini bildirib.

Epşteyn işi və hələ də açılan "gizli fayllar"

2008-ci ildə Ceffri Epşteyn yetkinlik yaşına çatmayan qızı fahişəliyə cəlb etməkdə təqsirli bilinib. 2019-cu ildə isə o, yenidən həbs olunaraq qadın və yeniyetmələrin alveri və onların fahişəliyə cəlb olunması ittihamları ilə üzləşib. Həmin il Epşteyn məhkəmə başlamazdan əvvəl həbsxana kamerasında ölü tapılıb.

Onun yaxın əməkdaşı Gisleyn Maksvell isə sonradan ABŞ məhkəməsi tərəfindən 20 il həbs cəzasına məhkum edilib. Hazırda istintaq materiallarının bir hissəsi mərhələli şəkildə məxfilikdən çıxarılır. Bu sənədlərdə müxtəlif siyasətçilərin, milyardçıların və hətta kral ailəsi üzvlərinin adlarının çəkildiyi bildirilir.

Maksvell eyni zamanda ABŞ federal məhkəməsində "Epşteyn faylları:nın açıqlanmasını nəzərdə tutan xüsusi qanunun konstitusiyaya zidd olduğunu iddia edərək təxminən 90 min səhifəlik sənədin yayımlanmasına qadağa qoyulmasını tələb edir.

Britaniya şahzadəsi ilə bağlı sensasiyalı iddialar

Epşteyn qalmaqalı yalnız ABŞ siyasətçilərini deyil, Britaniya monarxiyasını da sarsıdıb. Britaniya mediasında yayımlanan yeni araşdırmalar keçmiş kral ailəsi üzvü şahzadə Endryu barədə də ciddi iddiaları yenidən gündəmə gətirib.

Tarixçi Endryu Louninin "Entitled" adlı kitabında şahzadənin şəxsi həyatına dair qalmaqallı detallar yer alır. Müəllif şahzadənin yaxın çevrəsindən alınmış müsahibələrə əsaslanaraq onun "seksə aludə olduğunu və həddindən artıq pozğun həyat tərzi sürdüyünü" iddia edir. Kitabda hətta Epşteynin özünün də guya şahzadə haqqında "o, məndən də daha ifratdır" kimi ifadələr işlətməsi qeyd olunur.

Müxtəlif şahidlərin sözlərinə görə, şahzadənin həyatında çoxsaylı qadınlarla münasibətlər, porno aktrisalarla əlaqələr və digər qalmaqallı epizodlar olub. Hətta bəzi məlumatlara görə, onun şəxsi həyatında minə yaxın qadınla əlaqə iddiaları səsləndirilir. Kral sarayı isə bu cür iddiaların əksəriyyətini şərh etməkdən imtina edib və ya təkzib edib.

Beləliklə, "Epşteyn faylları"nın yeni hissələrinin açıqlanması illərdir davam edən qalmaqalı yenidən dünya mediasının əsas mövzularından birinə çevirib. İstintaq materiallarında yer alan iddiaların bir çoxu hələ də sübut olunmayıb, lakin sənədlərin tədricən açıqlanması siyasət, biznes və hətta kral ailəsi ilə bağlı yeni suallar doğurmağa davam edir.