"ABŞ və İsrail İran səmasında tam üstünlük əldə etməyib" - "The War Zone"

"İranın HHM sistemi hələ də koalisiya aviasiyası üçün ciddi təhlükə yaradır..."

ABŞ və İsrail İran səmasında hələ də tam hava üstünlüyü əldə edə bilməyiblər.

Moderator.az xəbər verir ki, bu barədə "The War Zone" nəşri yazıb.

İran səması hələ də tam nəzarət altında deyil

Hərbi analitik və nəşrin baş redaktoru Tayler Roqovey qeyd edir ki, hazırda yalnız bəzi bölgələrdə lokal üstünlük mövcuddur. Onun sözlərinə görə, İranın HHM sistemi hələ də effektiv fəaliyyət göstərir və müttəfiq aviasiya üçün real təhlükə olaraq qalır. 

Buna görə də İran səmasının tam nəzarət altına alındığı barədə iddialar reallığı tam əks etdirmir. ABŞ hərbi rəhbərliyi də belə bir üstünlüyün əldə edildiyini rəsmi şəkildə açıqlamayıb. Bu isə onu göstərir ki, əməliyyatların hazırkı mərhələsində vəziyyət daha mürəkkəbdir və hava məkanına nəzarət hələ də məhduddur.

ABŞ əməliyyat taktikasını dəyişir

Məqalədə qeyd olunur ki, ABŞ və müttəfiqləri hərbi əməliyyatların taktikasını dəyişməyə başlayıblar. Əvvəllər zərbələr əsasən İran HHM sistemlərinin fəaliyyət radiusundan kənardan endirilirdisə, indi birbaşa İran ərazisi üzərində hava zərbələrinə keçid başlayıb.

ABŞ Silahlı Qüvvələrinin Birləşmiş Qərargah Rəisləri Komitəsinin rəhbəri Den Keyn bildirib ki, bu mərhələdə yüksək dəqiqlikli JDAM bombaları və digər ağır sursatlardan istifadə olunur. Bu silahlar xüsusilə möhkəmləndirilmiş və yeraltı hərbi obyektlərin məhv edilməsi üçün nəzərdə tutulub.

İran HHM-i əməliyyatları çətinləşdirir

Analitiklər hesab edir ki, koalisiya aviasiyası üçün ən böyük təhlükə İranın mobil HHM sistemləridir. Bu komplekslər mövqelərini tez dəyişdirdiyinə görə onları aşkar edib məhv etmək çətindir. Bundan başqa, İranın şərq hissəsində HHM sistemlərinin böyük hissəsi demək olar ki, zədələnmədən qalıb.

Bu səbəbdən həmin bölgədə ABŞ və İsrail təyyarələrinin uçuşları daha risklidir. HHM sistemlərini zərərsizləşdirmək üçün radiasiya əleyhinə AGM-88 raketləri ilə silahlanan qırıcılar və "MQ-9 Reaper" pilotsuz aparatları istifadə olunur. Buna baxmayaraq, ekspertlər bildirir ki, İran üzərində tam hava üstünlüyü hələ əldə olunmayıb və yaxın zamanda da bu, çətin görünür.