İranda hərbi əməliyyatların nəticələri: Ölən mülki şəxslərin sayı açıqlandı

Bizi sosial şəbəkələrdən izləyin:

ABŞ və İsrailin İrana qarşı 2026-cı il fevralın 28-dən başlanan əməliyyatları nəticəsində İranda ölənlərin ümumi sayı açıqlanıb.

Moderator.az-ın xəbərinə görə, bu barədə İnsan Haqları Müdafiəçiləri Qrupu (HRANA) hesabat dərc edib.

Münaqişənin başlanğıcından bəri ümumiləşdirilmiş məlumatlara görə, mülki əhali arasında qeydə alınmış ölümlərin ümumi sayı 1 114 nəfər təşkil edib ki, bunlardan 183-ü uşaqdır və onların əksəriyyəti 10 yaşdan kiçikdir. Həmçinin qeydə alınmış 926 ölüm halı hazırda nəzərdən keçirilir, yoxlanılma və təsnifat gözləyir.

Eyni zamanda, İran Qızıl Aypara Cəmiyyəti ABŞ və İsrailin İranın müxtəlif bölgələrinə davam edən hücumları nəzərə alınmaqla, müharibənin ilk günündən bəri əməliyyatlar və zərərlər barədə ətraflı hesabat dərc edib.

Hesabata əsasən:

- Müharibənin başlanğıcından bəri ölkənin 174 şəhəri hücuma məruz qalıb, ümumilikdə 636 yerdə 1 332 hücum qeydə alınıb.

- Bu günə qədər 105 mülki obyekt və mərkəz hücuma məruz qalıb və ciddi ziyan görüb.

- Birbaşa hücuma məruz qalan və ciddi zərər görən yaşayış məntəqələri Marağa, Urmiya, Lamərd, İsfahan, Həmədan, Kürdüstan bölgəsi, Kirmanşah şəhərləri, eləcə də Narmak, Şəhid Keşvordost, Qaem yaşayış bölgəsi, Şəhid Borucerdi yaşayış kompleksi və Kosar yaşayış kompleksi daxil olmaqla, Tehranın rayonlarında yerləşib.

- Qəzvin əyalətindəki Əlborz Qızıl Aypara filialı, Həmədandakı Tecarak yardım və xilasetmə bazası, Xomeyni Qızıl Aypara filialı, Lorestandakı Zalian yardım və xilasetmə bazası, Baneh Qızıl Aypara filialı, Tehrandakı Qızıl Aypara kompleks reabilitasiya mərkəzi və Buşer yardım anbarı da daxil olmaqla, Qızıl Ayparanın 7 bazası və filialı zərər görüb.