"Britaniya Ukraynaya qoşun göndərməyə hazırlaşır? Londonun yeni siyasi siqnalı" - BBC

"Conson və Hili həm indiki mərhələ, həm də müharibədən sonrakı dövr üçün açıq mövqe ortaya qoyur..."

Böyük Britaniyanın keçmiş baş naziri Boris Conson Ukraynaya qeyri-döyüş təyinatlı britaniya hərbçilərinin dərhal göndərilməsinin mümkün və məntiqli olduğunu bildirib. 

Moderator.az xəbər verir ki, o, "bbc.com" nəşrinə müsahibəsində bəyan edib.

Qərbin gecikmiş qərarları və etiraf

O, qeyd edib ki, əgər London və müttəfiqlər müharibədən sonra sülhməramlı qüvvə yerləşdirməyi planlaşdırırsa, bunu indidən etmək daha rasional olardı. Conson məsələni siyasi müstəviyə çıxararaq bildirib: "Ukrayna azad dövlətdirmi, yoxsa Rusiyanın vassalı?" Əgər azaddırsa, onun ərazisində hansı xarici qüvvələrin olacağına Moskva deyil, Kiyev qərar verməlidir.

O, qoşunların cəbhəyə deyil, təhlükəsiz bölgələrə göndərilərək logistik və digər qeyri-döyüş tapşırıqları yerinə yetirə biləcəyini vurğulayıb. Keçmiş baş nazir eyni zamanda etiraf edib ki, Qərbin 2014-cü ildə Krımın ilhaqına və Suriyada kimyəvi silah istifadəsinə qarşı yetərincə sərt reaksiya verməməsi Vladimir Putini ruhlandırıb. Onun sözlərinə görə, 2022-ci ilin fevralında başlayan tammiqyaslı işğalın qarşısını daha qəti mövqe ilə almaq mümkün idi: "Biz daha çox şey etməli idik".

Londonun planı və 2026-cı il hədəfi

Böyük Britaniyanın müdafiə naziri Con Hili də sülh razılaşması əldə olunacağı halda Ukraynaya britaniya qoşunlarını göndərən ilk müdafiə naziri olmaq istədiyini açıqlayıb. O bildirib ki, 2026-cı il bu müharibənin başa çatdığı il olmalıdır.

London mümkün sülhməramlı missiyaya hazırlıq üçün 250 milyon dollardan çox vəsait ayırıb. Bu məbləğ texnikanın modernləşdirilməsinə, rabitə sistemlərinə və dronlara qarşı vasitələrə yönəldiləcək. Hili vurğulayıb ki, Ukraynanın əsas narahatlığı Qərbin yorulmasıdır, lakin "Ukraynanın dostları heç vaxt yorulmayacaq".

Qətiyyət sınağı

Londonun rəhbərlik etdiyi "İstəklilər koalisiyası" çərçivəsində 30-dan çox ölkə Ukraynada sülh sonrası təhlükəsizlik mexanizmini müzakirə edir. Moskva isə Ukraynada yerləşdiriləcək xarici qüvvələri "qanuni hədəf" adlandırıb.

Buna baxmayaraq, həm Consonun, həm də Hilinin mesajı aydındır: əgər Qərb Ukraynanın azad və suveren statusunu strateji prioritet sayırsa, bunu yalnız bəyanatlarla deyil, real addımlarla göstərməlidir. London artıq müharibənin sonrakı mərhələsinə hazırlaşdığını açıq şəkildə nümayiş etdirir.