"Rusiya yenidən Ukraynanın enerji və yaşayış məntəqələrini hədəfə alıb" - Ukrayna KİV-ləri

"Odessa, Nikolayev və Kiyevdə gecə hücumları nəticəsində minlərlə abonent işıqsız qalıb, ölən və yaralananlar var..."

Fevralın 22-nə keçən gecə Rusiya ordusu Ukraynanın cənub və paytaxt bölgələrinə qarşı növbəti genişmiqyaslı hücum həyata keçirib. 

Moderator.az xəbər verir ki, bu barədə "nv.ua" nəşri məlumat yayıb.

Zərbələr əsasən enerji infrastrukturu və yaşayış sahələrinə yönəlib. Nəticədə iri yanğınlar baş verib, minlərlə insan işıqsız qalıb, dağıntılar və insan tələfatı qeydə alınıb.

Odessa və Nikolayevdə enerji obyektləri hədəfdə

Gecə saatlarında Odessa və Nikolayev vilayətləri pilotsuz uçuş aparatları ilə vurulub. Yerli hakimiyyətin məlumatına görə, zərbələr enerji infrastrukturuna dəyib və genişmiqyaslı yanğınlara səbəb olub. 

Odessa Vilayət Hərbi Administrasiyasının rəhbəri Oleq Kiper bildirib: "Bu gecə Rusiya yenidən enerji infrastrukturu obyektlərinə PUA-larla zərbələr endirdi. Nəticədə böyük ərazilərdə yanğınlar baş verdi. Hazırda bütün yanğın ocaqları söndürülüb. Ölən və yaralanan yoxdur".

Vilayət prokurorluğunun açıqlamasına görə, təkcə Odessada 15 mindən çox abonent işıqsız qalıb. Energetiklər bərpa işlərini davam etdirirlər. Nikolayev vilayətində isə vəziyyət daha da ağırlaşıb. Vilayət rəhbəri Vitali Kimin sözlərinə görə, şəhər mərkəzi "Shahed 131/136" tipli dronlarla hücuma məruz qalıb. Nəqliyyat infrastrukturu və enerji obyektlərinə ziyan dəyib, 16 min abonent elektriksiz qalıb.

Son günlər Odessa vilayətinə edilən zərbələr demək olar ki, fasiləsiz xarakter alıb. Bir gün əvvəl baş verən hücum nəticəsində iki nəfər yaralanmış, onlarla min ailə işıqsız qalmışdı. Energetiklərin bildirdiyinə görə, bəzi yarımstansiyalarda kabellərin dəyişdirilməsi mürəkkəb və uzunmüddətli prosesdir - hər biri 250 metr uzunluğunda olan xətlərin yenilənməsi tələb olunur.

Kiyev və vilayətdə yaşayış binaları yanır

Eyni gecə Rusiya qüvvələri paytaxt Kiyev və ətraf bölgələrə də kütləvi hücum həyata keçirib. Hücum zamanı həm zərbə dronları, həm də qanadlı raketlərdən istifadə olunub.

Kiyev Şəhər Hərbi Administrasiyasının rəhbəri Timur Tkaçenko əvvəlcə Svyatoşinski rayonunda çoxmərtəbəli yaşayış binasının damında yanğın baş verdiyini bildirsə də, sonradan bu məlumat təsdiqlənməyib. Bununla belə, vilayətin müxtəlif rayonlarında dağıntılar və yanğınlar qeydə alınıb.

Ukrayna Fövqəladə Hallar Xidmətinin məlumatına görə, Kiyev vilayətində bir nəfər həlak olub, səkkiz nəfər dağıntılar altından xilas edilib, onların arasında bir uşaq da var. Beş nəfər xəstəxanaya yerləşdirilib. Dağıntılar Obuxov, Brovarı, Borispol, Buça və Fastov rayonlarında qeydə alınıb. Fastov rayonunun Putrovka kəndində xilasedicilər dağıntılar altından səkkiz nəfəri çıxarıblar.

"Təəssüf ki, bir nəfər xəstəxanaya aparılarkən yolda dünyasını dəyişib", - deyə xilasedicilər bildiriblər. Sofiyevskaya Borşaqovka qəsəbəsində isə fərdi yaşayış evlərində yanğınlar baş verib. Paytaxt meri Vitali Kliçko bildirib ki, ətraf qəsəbədən bir qadın və bir uşaq xəstəxanaya yerləşdirilib. İlkin məlumata görə, fərdi yaşayış sektoruna mərmi qalıqları düşüb.

Hücumlar davam edir

Rusiya ordusunun son həftələrdə enerji və mülki infrastruktura zərbələri intensiv xarakter alıb. Bir gün əvvəl Sum vilayətində təcili tibbi yardım avtomobilinə edilən hücum nəticəsində dörd nəfər həlak olub. Ölənlər arasında 17 yaşlı yeniyetmə və tibb işçisi qadın da olub.

Mövcud hücumlar göstərir ki, zərbələrin əsas hədəfi təkcə hərbi obyektlər deyil, həm də mülki infrastruktur və əhalinin gündəlik həyatını təmin edən enerji sistemidir. Bu isə ölkənin müxtəlif bölgələrində humanitar vəziyyəti daha da ağırlaşdırır.