"Tramp İrana qarşı məhdud zərbə variantını nəzərdən keçirir" - "The Wall Street Journal"

"Vaşinqton təzyiq ssenarisini masada saxlayır, Tehran isə Moskva ilə koordinasiyanı gücləndirir..."

ABŞ prezidenti Donald Tramp İrana qarşı məhdud hərbi zərbə endirmək variantını nəzərdən keçirir. Məqsəd Tehrana təzyiq göstərmək və onu nüvə sazişi üzrə Vaşinqtonun tələblərini qəbul etməyə məcbur etməkdir.

Moderator.az xəbər verir ki, bu barədə "wsj.com" nəşri yazıb.

Qəzetin mənbələrinə görə, ilk zərbə yaxın günlərdə endirilə bilər və əsas hədəflər hərbi və ya hökumət obyektləri olacaq. Planın məntiqi belədir: əgər İran uranın zənginləşdirilməsini dayandırmaqla bağlı tələbi qəbul etməzsə, ABŞ daha genişmiqyaslı kampaniyaya keçə bilər. Ağ Evdə həm məhdud "sınaq zərbələri", həm də bir neçə həftəlik intensiv hərbi əməliyyat ssenarisi müzakirə olunur.

Tramp bildirib ki, qərarını 10-15 gün ərzində verəcək: "Ya razılaşma olacaq, ya da onu başqa yolla əldə edəcəyik".
Bəzi amerikalı rəsmilər və analitiklər xəbərdarlıq edir ki, bu cür addım İranın cavab zərbələrinə səbəb ola və ABŞ-ı Yaxın Şərqdə daha geniş müharibəyə sürükləyə bilər.

Hərbi aktivlik və diplomatik gərginlik

Gərginlik fonunda ABŞ regionda hərbi mövcudluğunu artırır. "USS Gerald R. Ford" aviadaşıyıcısı Aralıq dənizinə daxil olub və müşayiətçi döyüş gəmiləri ilə birlikdə Yaxın Şərq istiqamətində irəliləyir. ABŞ Hərbi Hava Qüvvələrinə məxsus onlarla təyyarənin Avropa və region bazalarına yönləndirildiyi bildirilir.

Eyni zamanda "Bloomberg" nəşri qeyd edir ki, mümkün hərbi qərar martın 2-də Vyanada başlayacaq MAQATE-nin iclası ilə eyni vaxta təsadüf edə bilər. Diplomatik mənbələr yeni qətnamənin qəbulunun Vaşinqtona daha sərt addımlar üçün formal əsas yarada biləcəyini istisna etmir.

Tehran isə danışıqların tam pozulmadığını iddia edir. İranın xarici işlər naziri Abbas Araqçı bildirib ki, ABŞ "sıfır zənginləşdirmə" tələbi irəli sürməyib və tərəflər nüvə proqramının dinc xarakterini sübut edəcək mexanizmləri müzakirə edir. O, yeni çərçivə sənədinin yaxın günlərdə hazır ola biləcəyini deyib.

Bununla yanaşı, Cenevrə danışıqlarından sonra Rusiya ilə təmaslar intensivləşib. Rusiya XİN rəhbəri Sergey Lavrov İranın "qanuni hüquqlarına hörmət" prinsipini dəstəklədiklərini bəyan edib və ABŞ-ın tələblərini "qeyri-korrekt" adlandırıb.

Təhdid məktubu və qarşılıqlı ultimatumlar

İranın BMT-dəki daimi nümayəndəsi Baş katib Antonio Quterrişə məktub göndərərək xəbərdarlıq edib ki, hərbi təcavüz olacağı təqdirdə regiondakı ABŞ bazaları və müttəfiq obyektlər "qanuni hədəf" sayılacaq. Məktubda qeyd olunur ki, mümkün nəticələrə görə bütün məsuliyyət Vaşinqtonun üzərinə düşəcək.

Beləliklə, tərəflər həm diplomatik, həm də hərbi rıçaqları paralel işə salıb. Tramp administrasiyası təzyiq strategiyası ilə saziş əldə etməyə çalışır, Tehran isə güzəştləri minimum səviyyədə saxlamaqla vaxt qazanmağa və beynəlxalq dəstəyi artırmağa çalışır. Regionda isə hər an nəzarətdən çıxa biləcək təhlükəli balans formalaşır.