Trampın NATO-ya təzyiqi: İraq missiyası sona yaxınlaşır

ABŞ Prezidenti Donald Trampın administrasiyası NATO-ya təzyiq göstərir və alyansın İraq da daxil olmaqla digər ölkələrdəki missiyalarının azaldılmasını tələb edir.

Moderator.az xəbər verir ki , bu barədə "Politico" qəzeti məlumat yayıb.

Xəbərdə deyilir ki, ABŞ Donald Trampın rəhbərliyi altında NATO-nu alyansın İraqdakı əsas missiyasına son qoymaq da daxil olmaqla, xarici fəaliyyətlərinin bir çoxunu azaltmağa məcbur edir.

"Vaşinqton İraqdakı missiyanın 2026-cı ilin sentyabr ayına qədər başa çatdırılmasında israr edir. Bu missiya İraq təhlükəsizlik qüvvələrinin gücləndirilməsinə və İslam Dövlətinin (İŞİD) yaratdığı terror təhlükəsinə qarşı mübarizəyə yönəlmiş əməliyyatdır. Missiya Trampın 2018-ci ildəki ilk səlahiyyət müddəti ərzində yaradılıb və Bağdadın xahişi ilə bir neçə dəfə genişləndirilib,"- deyə məlumatda deyilir.

Eyni zamanda, "Politico"nun məlumatına görə, ABŞ Trampın müharibələrə son qoymaq öhdəliyi çərçivəsində İraqdan təxminən 2 500 əsgərini çıxarmağı planlaşdırır. Mənbə bildirib ki, bu addım İraq hökuməti ilə razılaşdırılıb.

Bundan əlavə, ABŞ Kosovoda NATO sülhməramlı qüvvələrinin azaldılması üçün lobbiçilik aparır və iyul ayında Ankarada keçiriləcək alyansın illik sammitində Ukrayna ilə onun Sakit okean tərəfdaşları - Avstraliya, Yeni Zelandiya, Yaponiya və Cənubi Koreyanın rəsmi iştirakına qarşı çıxır. Nəşr qeyd edir ki, NATO daxilində bu təşəbbüs "Zavod standartlarına qayıt" adı ilə tanınır.

ABŞ-nin bu planları NATO-nu əsasən Avro-Atlantik müdafiə blokuna çevirməyi, qlobal tərəfdaşlıqdan və alyansın xaricindəki böhranların idarə olunması əməliyyatlarından imtina etməyi hədəfləyir.

Diplomatlar bildirirlər ki, Vaşinqtonun yanaşması müqavimətlə qarşılaşıb.