"Putin daha iki il döyüşməyi planlaşdırır" - "The New York Times"

"Müharibə uzanır, amma Cenevrədə atəşkəs müzakirə olunur..."

Rusiya prezidenti Vladimir Putin müharibədə üstünlük qazandığına inanır və Donbasın tam işğalı üçün 18-24 ay vaxt lazım olacağını hesab edir.

Moderator.az xəbər verir ki, bu barədə "nyr.com" nəşri yazıb.

Qərb kəşfiyyat mənbələrinə görə, Kreml hesab edir ki, davam edən döyüşlər və Ukraynanın enerji obyektlərinə endirilən zərbələr Moskvanın mövqeyini gücləndirir. Bununla yanaşı, Rusiya iqtisadiyyatının ciddi çətinliklərlə üzləşdiyi vurğulanır. ABŞ prezidenti Donald Trump isə müharibə bitərsə, Rusiyaya iri investisiya imkanları təklif etməklə alternativ siqnal verir.

Bəzi analitiklər Putinin Vaşinqtonla yaxınlaşma və Ukrayna qüvvələrinin Donbasın qalan hissəsindən çıxması fonunda atəşkəsə razılaşa biləcəyini istisna etmirlər. Ukrayna prezidenti Vladimir Zelenski isə Donbasın güzəştə gedilməyəcəyini bildirib. Onun sözlərinə görə, regionun tam işğalı Rusiyaya təxminən 800 min əlavə hərbçi və azı iki il vaxt bahasına başa gələ bilər və Rusiya iqtisadiyyatı buna davam gətirməyə bilər.

Cenevrə danışıqları: hərbdə irəliləyiş, siyasətdə durğunluq

Cenevrədə Ukrayna, ABŞ və Rusiya arasında keçirilən danışıqlarda atəşkəsin monitorinqi ilə bağlı müəyyən irəliləyiş əldə olunduğu bildirilir. Zelenskinin sözlərinə görə, siyasi iradə olarsa, hərbçilər atəşkəsə nəzarət mexanizmini razılaşdıra bilərlər və prosesdə ABŞ tərəfi də iştirak edəcək.

Lakin ərazi məsələləri üzrə ciddi yaxınlaşma yoxdur. Ukrayna Milli Təhlükəsizlik və Müdafiə Şurasının katibi Rüstəm Ömərov təhlükəsizlik mexanizmlərinin müzakirə edildiyini, bəzi məsələlərin razılaşdırıldığını, digərlərinin isə əlavə uzlaşma tələb etdiyini bildirib.

Qərb mediası, o cümlədən "Axios" nəşri ilk mərhələdə ciddi irəliləyiş olmadığını yazıb. Rusiya nümayəndə heyətinin rəhbəri Vladimir Medinski isə danışıqları "çətin, lakin işgüzar" adlandırıb.

Beləliklə, hərbi müstəvidə texniki yaxınlaşma olsa da, siyasi səviyyədə əsas ziddiyyət - ərazi məsələsi açıq qalır. Müharibənin uzanacağı, yoxsa atəşkəsə gediləcəyi yaxın aylarda veriləcək siyasi qərarlardan asılı olacaq.