"Ümumdünya Pişik Günü: tüklü dostlarımız ömrü necə uzadır?" - "Twoja Telewizja" (Polşa)

"Pişiklər tənhalığı aradan qaldırır, insanların həyatına sevinc gətirir..."

Fevralın 17-də Avropa ölkələrində Ümumdünya Pişik Günü qeyd olunur. Bu tarix təkcə ev heyvanlarını əzizləmək üçün deyil, həm də heyvanlara məsuliyyətli münasibəti təşviq etmək və sığınacaqlara diqqət çəkmək məqsədi daşıyır. 

Moderator.az xəbər verir ki, bu barədə Polşanın "TVS.pl" nəşri yazıb.

17 fevralın sirri: mistika və simvolika

Nəşr yazır ki, bu bayram insanla pişiyin qədim dövrlərin müqəddəs varlıqlarından bu gün ailələrin tamhüquqlu üzvlərinə qədər minilliklərə söykənən yolunu xatırlamaq üçün də bir fürsətdir. Tarixin seçimi təsadüfi deyil. Mənbələrin yazdığına görə, fevral ayı azad və müstəqil ruhu simvolizə edən Dolça bürcü ilə əlaqələndirilir ki, bu da pişiklərin xarakterinə uyğun hesab olunur.

17 rəqəmi isə maraqlı söz oyununa əsaslanır. Roma rəqəmi XVII latınca "VIXI" sözünün anaqramıdır və "yaşadım" (yəni həyat başa çatdı) mənasını verir. Lakin italyan ənənəsində bu, fərqli yozulur: əgər pişiyin yeddi canı varsa və onlardan biri "yaşanıbsa", deməli qarşıda hələ altı can var. Beləliklə, 17 rəqəmi pişiklər üçün bədbəxtlik deyil, dözümlülük rəmzi sayılır.

Pişiklər tənhalığa qarşı "canlı dərman"dır

Mütəxəssislər bildirir ki, pişiklər xüsusilə yaşlı insanlar üçün psixoloji baxımdan böyük dəstəkdir. Tək yaşayan təqaüdçülər üçün pişik sadəcə ev yoldaşı deyil, depressiyaya qarşı real "antidot" rolunu oynayır. Ev heyvanına qulluq - onu yemləmək, təmizliyinə nəzarət etmək və ya onunla oynamaq insanı aktiv saxlayır və gündəlik rejimə riayət etməyə sövq edir.

Pişiyin mırıltısı isə alimlər tərəfindən təbii sakitləşdirici vasitə kimi qiymətləndirilir: o, təzyiqi azaltmağa, narahatlığı zəiflətməyə və yuxunun keyfiyyətini yaxşılaşdırmağa kömək edir. Üstəlik, itlərdən fərqli olaraq, pişiklər uzun və fiziki cəhətdən çətin gəzintilər tələb etmir ki, bu da onları hərəkət imkanları məhdud olan insanlar üçün ideal dost edir.

Qədim müqəddəslikdən internet ulduzluğuna

Tarix boyu insanın pişiyə münasibəti dəyişkən olub. Qədim Misirdə onlar ilahi varlıq kimi qəbul edilir, pişiyi öldürmək ağır cinayət sayılırdı. Orta əsr Avropasında isə xurafat səbəbilə xüsusilə qara pişiklər cadugərlik və şər qüvvələrlə əlaqələndirilirdi. Bu gün isə pişiklər internetin "hakimi"nə çevrilib: onların iştirakı ilə çəkilən videolar milyonlarla baxış toplayır, memlər isə sosial şəbəkələrin ayrılmaz hissəsidir.

Bununla belə, heyvansevərlər xatırladır ki, Ümumdünya Pişik Günü ilk növbədə evsiz heyvanlara dəstək olmaq üçün fürsətdir. Bahalı cins heyvan almaqdansa, sığınacağa baş çəkmək və bir cana isti yuva bəxş etmək bu günü qeyd etməyin ən gözəl yoludur. Sevgi və məsuliyyət isə dördayaqlı dostlarımıza verə biləcəyimiz ən dəyərli hədiyyədir.