"Xameneidən ABŞ-a sərt mesaj: "Ən güclü ordu belə zərbə ala bilər" - "İran İnternational"

"Gərgin ritorika və kövrək diplomatiya fonunda Vaşinqton - Tehran xəttində kritik mərhələ..."

İranın ali dini lideri Əli Xamenei ABŞ-a ünvanladığı çıxışında kəskin bəyanatlar səsləndirib.

Moderator.az xəbər verir ki, bu barədə "iraninternational.com" nəşri məlumat yayıb.

Ali dini lider ABŞ prezidenti Donald Trampın İranla bağlı hərbi ritorikasına cavab verərək bildirib ki, "ən güclü ordu belə elə bir zərbə ala bilər ki, bir daha ayağa qalxa bilməz. Xamenei Vaşinqtonu danışıqların nəticəsini əvvəlcədən diktə etməyə çalışmaqda ittiham edib və bunun "yanlış və ağılsız addım" olduğunu deyib. 

Onun sözlərinə görə, İran təzyiq altında güzəştə getməyəcək və ölkə öz maraqlarından geri çəkilməyəcək. İran tərəfi açıq şəkildə bəyan edir ki, danışıqlar mümkündür, lakin "təslimçilik" müzakirə mövzusu deyil.

Cenevrədə nüvə danışıqları: razılaşma, yoxsa yeni gərginlik?

BBC nəşrinin məlumatında isə deyilir ki, Xameneinin bu çıxışı fonunda Cenevrədə ABŞ və İran arasında nüvə proqramı ilə bağlı növbəti dolayı danışıqlar raundu keçirilib. Görüşlər Oman vasitəçiliyi ilə baş tutub. ABŞ-ni prezidentin xüsusi nümayəndəsi Stiv Uitkoff və Cared Kuşner, İranı isə xarici işlər naziri Abbas Araqçı təmsil edib.

Tramp danışıqlarda "dolayı şəkildə" iştirak etdiyini bildirib və İranın razılaşmada maraqlı olduğunu düşündüyünü deyib. O, razılaşma əldə olunmadığı halda hərbi variantın istisna edilmədiyini də vurğulayıb. Tehran isə əsas müzakirə mövzularının nüvə proqramı və ABŞ sanksiyalarının mümkün ləğvi olduğunu açıqlayıb.

Diplomatiya ilə yanaşı hərbi hazırlıq

Danışıqlarla paralel olaraq bölgədə hərbi aktivlik artmaqdadır. ABŞ Yaxın Şərqdə hərbi mövcudluğunu gücləndirib. Peyk görüntülərinə əsasən, "USS Abraham Lincoln" aviadaşıyıcısı İran yaxınlığında yerləşdirilib, həmçinin "USS Gerald R. Ford" gəmisinin bölgəyə göndərildiyi bildirilir.

Buna cavab olaraq İslam İnqilabı Keşikçiləri Korpusu Hörmüz boğazında hərbi təlimlərə başlayıb. Strateji əhəmiyyətə malik bu bölgədə hərbi fəallığın artması danışıqların kölgəsində yeni risklərin yarandığını göstərir. Beləliklə, Cenevrədə diplomatik dialoq davam etsə də, tərəflərin sərt ritorikası və paralel hərbi hazırlığı prosesin hələ də kövrək və qeyri-müəyyən olduğunu ortaya qoyur.