"Süni intellekt həm gündəlik həyatımızı, həm də qlobal geosiyasəti müəyyən edəcək" - "Forbes"

"Süni intellektin yüksəlişi və qlobal təsiri..."

Süni intellekt həyatımızın ayrılmaz bir hissəsinə çevrilib. İstər işimizi optimallaşdırmaq, istərsə də gündəlik tapşırıqları həll etmək üçün istifadə olunur, və biz bəzən bunu anlamadan onunla daima qarşılıqlı əlaqədəyik.

Moderator.az xəbər verir ki, bu barədə "forbes.com" nəşri yazıb.

Süni intellektin (Sİ) əsasını təşkil edən neyron şəbəkələri ötən yarım əsr ərzində formalaşıb, lakin əvvəllər resurs və texniki imkanlar çatışmırdı. Bu gün isə Sİ sistemlərinin effektivliyi enerjidən, yüksək texnologiyalı serverlərdən və nadir torpaq elementlərindən asılıdır.

Məsələn, serverlər üçün neodim və prazeodim kimi materiallar həyati əhəmiyyət kəsb edir və onların böyük hissəsi Çin tərəfindən tədarük olunur.
Belə şəraitdə ABŞ və digər Qərb ölkələri enerji və xammal mənbələrini təmin etmədən Sİ sahəsində liderliklərini saxlaya bilməzlər. Bu səbəbdən Qərb ölkələri strateji olaraq enerji resurslarını artırmalı və Çinlə xammal bazasında rəqabət aparmalıdır.

Süni intellekt agentləri və gündəlik həyat

Nəşrin proqnozuna görə, 2026-cı ildə lokal AI-süperproqramlar əsas trend olacaq. "Apple", "Google:, "Microsoft" və "Yandex" kimi şirkətlər bu sahədə gündəliyi müəyyən edəcəklər. Sİ agentləri - istifadəçinin əvəzinə hərəkət edə bilən sistemlər - gündəlik həyatda və işdə rutin tapşırıqları öz üzərinə götürəcək: məhsul sifarişi, səyahət təşkili, ağıllı ev sistemləri ilə qarşılıqlı əlaqə.

Ofislərdə bu agentlər layihələrin koordinasiyası və icrasını idarə edəcək, həmçinin xarici tərəfdaşlarla ünsiyyət quracaqlar. 2026-cı ilə qədər onlayn kontentin 90 faizi Sİ tərəfindən yaradılacaq. Bu, həm analitik fayda gətirsə də, insan təcrübəsinin yerini əvəz etdikdə unikal dəyəri azaldır. Sİ həm yeni iş imkanları yaradacaq, həm də rutin və inzibati işləri əvəz edərək işdən çıxarılma riskini artıracaq.

Süni intellekt və geosiyasi dinamika

Sİ yalnız virtual məkanda deyil, fiziki dünyada da görünən olur: avtonom nəqliyyat vasitələri, humanoid robotlar, IoT cihazları və tibbi sistemlər gündəlik həyatın ayrılmaz hissəsinə çevriləcək. Bununla yanaşı, Sİ  dövlətlər üçün strateji əhəmiyyət kəsb edir, bunlar iqtisadi təsir, hərbi üstünlük və texnologiyaların yayılmasına nəzarətdir.

Sİ elektrik və telekommunikasiya kimi normaya çevriləcək. Gələcək nəsillər Sİ ilə söhbəti təbii bir hissə kimi qəbul edəcək. Tibbdə isə Sİ artıq diaqnostikadan xəstələrin monitorinqinə qədər geniş tətbiq olunur, məsələn, ağıllı stetoskopiyadan istifadə edərək ürək ritmini saniyələrdə analiz etmək mümkündür.

Enerji səmərəliliyi 2026-cı ildə əsas mövzulardan olacaq. Alim və mühəndislər serverlərin soyudulması, yük idarəsi və yeni enerji mənbələrinin tədqiqi ilə məşğul olacaq, Sİ  sistemlərinin tələblərinə cavab verəcək mini-atom stansiyalarını planlayacaqlar.