"İnsan həyatı boyu neçə dəfə həqiqi aşiq olur? - Psixoloqların araşdırması

"10 mindən çox insanın cavabı gözləntiləri dəyişdi..."

Ehtiraslı sevgi şeirlər, romanlar və filmlərdə ən güclü hiss kimi təsvir olunur. Amma bu duyğunun həyat boyu nə qədər tez-tez yaşandığı indiyədək ciddi şəkildə ölçülməyib.

Moderator.az xəbər verir ki, bu barədə "nauka.tv.ru" nəşri yazıb.

Həyatı boyu orta hesabla iki dəfə

Nəşr yazır ki, ABŞ-da fəaliyyət göstərən Kinsi Institutunun alimləri ilk dəfə bu suala kəmiyyət baxımından cavab verməyə çalışıb. Araşdırmada yaşı 18-dən 99-a qədər olan 10 036 subay yetkin iştirak edib. Onlara birbaşa belə sual ünvanlanıb: "Həyatınızda sizi tam şəkildə bürüyən sevgini neçə dəfə yaşamısınız?"

Nəticələrə görə, insanlar orta hesabla iki dəfə belə güclü hiss keçirdiklərini bildiriblər. Statistik bölgü isə belədir: iştirakçıların 14 faizi həyatında heç vaxt bu cür sevgi yaşamadığını deyib, 28 faizi bir dəfə, 30 faizi iki dəfə, 17 faizi üç dəfə, 11 faizi isə dörd və daha çox dəfə sevgi yaşadığını deyib.

Tədqiqatın aparıcı müəllifi, doktor Amanda Hesselman qeyd edib ki, insanlar tez-tez aşiq olduqlarını desələr də, əslində həyatı boyu "tam ehtiraslı sevgi" nadir hadisədir və davamlı şəkildə baş vermir.

Yaş və cins fərqi varmı?

Araşdırma göstərib ki, yaş artdıqca bu təcrübənin sayı da bir qədər yüksəlir. 18-19 yaş qrupunda orta göstərici 1,61 dəfə olduğu halda, 50-59 yaş aralığında bu rəqəm 2,4-ə çatır. 60-69 yaşlılar orta hesabla 2,3 dəfə ehtiraslı sevgi yaşadıqlarını bildirib. Kişilər orta hesabla 2,21 dəfə, qadınlar isə 1,92 dəfə bu hissi keçirdiklərini deyib. Fərqlər minimal hesab olunur. Heteroseksual və homoseksual iştirakçılar arasında da ciddi statistik fərq qeydə alınmayıb.

Sevgi nadirdir, amma güclüdür

Tədqiqat birbaşa sorğu üsulu ilə aparılıb və iştirakçılar münasibətlərin sayını deyil, hisslərin intensivliyini xatırlayıblar. Bu da nəticələrin real emosional təcrübəyə daha yaxın olmasına imkan verib.

Alimlər hesab edir ki, ehtiraslı sevgi həyatı boyu tez-tez rast gəlinən hal deyil və xüsusilə gənclik dövrü ilə daha sıx bağlıdır. Bu isə cəmiyyətin sevgiyə baxışını yenidən düşünməsi üçün əsas yaradır. Araşdırma göstərir ki, romantik gözləntilər çox vaxt media və populyar mədəniyyət tərəfindən şişirdilir. Halbuki həyatı boyu böyük ehtiras nadir, lakin güclü bir hadisədir. 

Mütəxəssislər vurğulayır ki, münasibətlərdə yalnız "böyük ehtiras" axtarışına fokuslanmaq əvəzinə, sevginin digər formalarına - qayğı, bağlılıq və sabitliyə də dəyər verilməlidir. Beləliklə, "bir dəfə və əbədi" mifindən fərqli olaraq, real həyat göstərir ki, insan həyatı boyu bir neçə dəfə həqiqi və dərin şəkildə aşiq ola bilər və bu, tamamilə normaldır.