Rusiyada sovet xalqının soyqırımını inkar etməyə görə cinayət cəzaları təklif olunub

Rusiyada sovet xalqının soyqırımını inkar etməyə görə cinayət cəzalarının tətbiq edilməsi təklif olunub.

Moderator.az xəbər verir ki, qanun layihəsi “Vahid Rusiya” partiyasından olan bir qrup deputat tərəfindən təqdim edilib.

Sənəddə Rusiya Cinayət Məcəlləsinin 243.4 ("hərbi məzarlara zərər vurmaq") və 354.1 ("nasizmin reabilitasiyası") maddələrinə dəyişiklik edilməsi təklif olunur.

Birinci maddənin məsuliyyətinin sovet xalqının soyqırımı qurbanlarının məzarlarının və abidələrinin təhqir edilməsi ilə bağlı cinayətlərə də şamili edilməsi təklif olunur. Bu maddə üzrə cəza beş milyon rubla qədər cərimə, məcburi əmək və ya beş ilə qədər həbsdir.

Deputatlar Cinayət Məcəlləsinin 354.1-ci maddəsinə sovet xalqının soyqırımını inkar etməyə və soyqırımı qurbanlarının xatirəsini təhqir etməyə görə cəzalar əlavə etməyi də təklif edib. Bu ittihamlar üç milyon rubla qədər cərimə, məcburi əmək və ya üç ilə qədər həbs cəzası ilə nəticələnə bilər.

Deputatların sözlərinə görə, tarixi saxtalaşdırmaq və nasist ideologiyasını haqlı çıxarmaq cəhdləri cəmiyyətdə artmaqdadır və “qanun layihəsi tarixi yaddaşın qorunması üçün hüquqi çərçivəni gücləndirməyi hədəfləyir”.