"Ukraynada müharibə 2026-cı ildə bitə bilərmi: üç real ssenari" - "The Wall Street Journal"

"Ukrayna və Rusiya ağır itkilərə baxmayaraq müharibəni davam etdirir..."

Ukraynada müharibənin 2026-cı ilin sonuna qədər başa çatması çox az ehtimal olunur. 

Moderator.az xəbər verir ki, bu barədə "wsj.com" nəşri yazıb.

Müharibənin uzanması: ən real ssenari

Nəşrin yazdığına görə, mövcud dinamika göstərir ki, tərəflər hələ də müharibəni davam etdirmək imkanına malikdir və bu, getdikcə daha ağır bədəllə müşayiət olunur. Nəşr yazır ki, ən mümkün variant aşındırıcı və uzunmüddətli müharibənin davam etməsidir.

Danışıqlar aparılsa da, real irəliləyiş yoxdur. Kremlin yalnız maksimalist məqsədlərlə çıxış etməsi - ərazi tələbləri və Ukrayna üzərində nəzarət istəyi kompromisi mümkünsüz edir. Kiyev isə tabe olmağı qətiyyətlə rədd edir.

Eyni zamanda, hər iki tərəf ABŞ amilindən çəkinir. Ukrayna ABŞ kəşfiyyatına və dəstəyinə ehtiyac duyur, Rusiya isə daha sərt sanksiyalardan ehtiyatlanır. Bu səbəbdən tərəflər Vaşinqtona "konstruktiv mövqe" nümayiş etdirməyə çalışır, məsuliyyəti isə bir-birinin üzərinə atır.

Zəifləmə riski: Ukrayna, yoxsa Rusiya?

Analitiklər Ukrayna üçün əsas riskin canlı qüvvənin tükənməsi olduğunu bildirirlər. Donbasda Rusiyanın hücumları son dərəcə yavaş və baha başa gəlsə də, Ukraynanın məhdud ehtiyatları müdafiəni zəiflədib. Nəşr bunu "ya boynu, ya da ayaqları açıq qalan qısa yorğan"la müqayisə edir.

Digər tərəfdən, ABŞ Strateji və Beynəlxalq Araşdırmalar Mərkəzinin (CSIS) məlumatına görə, Rusiya da ciddi aşınma yaşayır. İqtisadi durğunluq, enerji gəlirlərinə təzyiq və sanksiyalar Kremlin imkanlarını məhdudlaşdırır. Lakin Putin hələlik itkiləri qəbuledilən sayır və kompromisə tələsmir.

İtki miqyası və danışıqların dalana dirənməsi

CSIS hesab edir ki, 2022-ci ildən bəri Rusiya və Ukraynanın ümumi hərbi itkiləri 2 milyon nəfərə yaxınlaşır. Rusiya təxminən 1,2 milyon, Ukrayna isə 500-600 min hərbçi itirib. Bu, Rusiya üçün İkinci Dünya müharibəsindən bəri görünməmiş miqyasdır.

"Politico"nun yazdığına görə, sülh danışıqları hələ də əsas məsələlər - ərazilər, təhlükəsizlik zəmanətləri və atəşkəs üzərində razılaşma olmadığı üçün dalana dirənib. Nəticə etibarilə, tərəflər ağır itkilərə baxmayaraq müharibəni davam etdirə biləcəklərinə inanır və bu da 2026-cı ildə sülh ehtimalını son dərəcə zəif edir.