"Trampın Qrenlandiya və Ukrayna siyasəti ABŞ-ın etibarını zədələyib" - "Reuters"

"Ani qərarlar və mərkəzləşdirilmiş siyasət ABŞ-ın müttəfiqləri ilə etibarını sarsıdır..."

ABŞ-ın ani qərarları və gözlənilməz siyasət dəyişiklikləri əsas müttəfiqlərlə münasibətlərə uzunmüddətli zərər vura bilər.

Moderator.az xəbər verir ki, bu barədə "reuters.com" agentliyi yazıb.

Siyasi qərarların mərkəzləşdirilməsi

Analitiklər bildirir ki, Trampın Qrenlandiyanı verməyi tələb etməsi ABŞ-ın alyanslarına etibarına ciddi xələl gətirib. ABŞ-ın xarici siyasəti Donald Trampın ikinci müddətində bir sıra məsələlərdə tez-tez kəskin dəyişib və milli təhlükəsizlik rəsmilərinin iştirakı olmadan formalaşıb.

"Reuters" yazır ki, prezident və yaxın köməkçilərinin qərarları əsasən Trampın şəxsi mövqeyinə əsaslanıb. Bu yanaşma Trampın Vaşinqton bürokratisiyasına etimadsızlığı və sürətli qərar qəbul etmə istəyi baxımından ona sərf edir, lakin ani açıqlamalar müttəfiqlərlə münasibətlərdə ciddi risk yaradır.

Hərbi hədələr və qarışıqlıq

Son həftələrdə Tramp və administrasiyanın rəsmiləri Qrenlandiyada güc tətbiqi ehtimalına dair açıqlamalar verib, bu da Vaşinqtonda və ABŞ-ın müttəfiqləri arasında çaşqınlıq yaratıb. Nəşr yazır ki, qanunvericilər Dövlət katibi Marko Rubio və Ağ Ev rəsmilərinə zəng edərək narahatlıqlarını bildirib və hərbi addımların atılmamasını tövsiyə ediblər.

Pentaqon və Ağ Evin sabiq əməkdaşı Kori Şeyk bildirir: "Trampın hədələri o qədər ardıcıl deyil ki, onun bunu təkrar etməyəcəyinə heç kim zəmanət verə bilməz. Bu, ABŞ-ı yaxın dostlarımızın gözündə etibarsız edib".

Ukrayna danışıqlarında mərkəzləşmiş yanaşma

Trampın xarici siyasətdə qərarları mərkəzləşdirməsi, etibarlı köməkçilərə güvənməsi və ekspertləri prosesdən uzaqlaşdırması ikinci müddətinin davamlı təzahürüdür. Bu, Ukrayna müharibəsinin dayandırılması ilə bağlı danışıqlarda da özünü göstərib.

Xüsusilə xüsusi nümayəndə Stiv Uitkoff, Trampın qayını Cared Kuşner və Rusiya nümayəndəsi Kirill Dmitriyev arasında keçirilən görüşlər nəticəsində 28 maddəlik plan hazırlanıb. "Reuters" yazır ki, adətən belə planlardan xəbərdar olan Dövlət Departamenti və Milli Təhlükəsizlik Şurasının yüksək səviyyəli əməkdaşları proses barədə məlumatlandırılmayıb.

Tramp siyasətinin nümunələri

Tramp əvvəllər Kanadaya Çinlə ticarət razılaşması bağladığı halda 100 faiz idxal rüsumu tətbiq etməklə hədələyib. Bu qərar Senatda tənqid olunub.
Bundan başqa, Tramp Böyük Britaniyanın Əfqanıstanda "ön cərgədən kənarda qaldığını" iddia edərək, baş nazir Kir Starmer və digər siyasi liderlərin, eləcə də kral III Karlın narazılığına səbəb olub. Bir neçə gün sonra ABŞ prezidenti mövqeyini dəyişərək Britaniya əsgərlərini tərifləyib.