"Bruklin Bekhem ailəsi ilə münasibətləri kəsib: ittihamlar, qalmaqallar və açıq qarşıdurma" - "The Sun"

"Bruklin Bekhem valideynlərinə qarşı qalmaqallı ittihamlar irəli sürərək ailədən uzaqlaşdığını açıqlayıb..."

Devid və Viktoriya Bekhemın böyük oğlu Bruklin Bekhem ailəsi ilə bütün əlaqələri kəsib və valideynlərinə qarşı bir sıra ağır ittihamlar irəli sürüb.

Moderator.az xəbər verir ki, bu barədə "thesun.com" nəşri yazıb.

Bekhemin sözlərinə görə, uzun illər ailə nəzarəti, psixoloji təzyiq və ictimai imic naminə qurulan "saxta münasibətlər" onun həyatını formalaşdırıb.

"Nəzarət altında böyümüşəm"

26 yaşlı Bruklin iddia edir ki, valideynləri illər boyu onun həyatına və qərarlarına tam nəzarət edib. O, ailəsinin həyat yoldaşı Nikola Peltsi "onu idarə etməkdə" ittiham etməsini qətiyyətlə rədd edir və əksinə, məhz Devid və Viktoriya Bekhemı manipulyasiya və mediada məqsədli məlumat sızdırmaqda günahlandırır.

Bruklin bildirib ki, ailədən uzaqlaşdıqdan sonra illərlə yaşadığı güclü təşviş hissi aradan qalxıb. O, ilk dəfə olaraq şəxsi sərhədlərini qoruduğunu və bunun onun üçün dönüş nöqtəsi olduğunu deyir.

Toy, Nikola və dərin qırılma

Bruklinin sözlərinə görə, ailədaxili münasibətlər onun toyu zamanı tam qopub. O; iddia edir ki, toy ərəfəsində bəzi ailə üzvləri Nikolanın "qan bağı olmadığı" və "ailədən sayılmadığı" fikrini səsləndirib. Həmçinin Viktoriya Bekhemın son anda Nikolanın gəlinlik paltarını tikməkdən imtina etməsi, toyda masa düzülüşü, ilk rəqs zamanı yaşananlar və digər epizodlar münasibətləri daha da gərginləşdirib.

Bruklin bütün bu hadisələrin onun üçün ailəsinin "həqiqi simasını" açdığını vurğulayır. Bekhem ailəsinə yaxın mənbələr isə valideynlərin barışıq üçün dəfələrlə addım atdığını, xüsusilə Milad dövründə Bruklini geri qaytarmaq istədiklərini bildirir.

Pul, brend və tam ayrılıq

Ən sarsıdıcı iddialardan biri Bruklinin valideynlərini toy ərəfəsində onu rəsmi şəkildə "Bekhem" soyadından imtina etməyə məcbur etməyə çalışmaqda və bunun üçün maddi təzyiq göstərməkdə günahlandırmasıdır. Onun sözlərinə görə, bu hadisədən sonra ailə münasibətləri birdəfəlik dəyişib.

Bruklin hesab edir ki, ailə üçün "Bekhem brendi" real münasibətlərdən daha önəmlidir. O və Nikola isə mediadan, imic oyunlarından və manipulyasiyalardan uzaq, sakit və şəxsi bir həyat istəyirlər.

Bruklin açıq şəkildə bəyan edib ki, hazırda ailəsi ilə barışmaq niyyətində deyil və seçdiyi bu yol ona daxili rahatlıq gətirib. Bekhem ailəsi isə ittihamlarla bağlı rəsmi açıqlama verməyib, lakin yaxın çevrələr bu vəziyyətin xüsusilə Viktoriya Bekhem üçün ciddi emosional zərbə olduğunu bildirir.