İran ordusu döyüşə tam hazırdır: Region yeni qarşıdurma astanasındadır?

İranın Silahlı Qüvvələri tam döyüş hazırlığı vəziyyətinə gətirilib.

Moderator.az-ın "Tasnim" agentliyinə istinadən məlumatına görə, bu barədə İslam İnqilabı Keşikçilər Korpusunun (SEPAH) komandanının müavini Əhməd Vahidi bildirib.

"İslam Respublikasının Silahlı Qüvvələrinin imkanları əladır, onlar mümkün döyüşlərə maksimum hazır vəziyyətindədirlər", - deyə o qeyd edib.

Xatırladaq ki, 2025-ci il dekabrın 29-da Tehranda İran rialının kəskin düşməsi səbəbindən ticarətçilərin etiraz aksiyaları başlayıb. Bir gün sonra etirazlara tələbələr də qoşulublar. Narazılıqlar qısa müddətdə İranın əksər iri şəhərlərinə yayılıb. 2026-cı il yanvarın 2-də vəziyyət daha da gərginləşib - şəhər küçələrində naməlum silahlı qruplar peyda olub. Etirazçılarla hüquq-mühafizə orqanları arasında silahlı toqquşma halları artıb.

İğtişaşların zirvəsi 8 yanvar axşamına təsadüf edib, bu zaman ən azı 12 mülki vətəndaş, o cümlədən bir uşaq həlak olub. Hakimiyyət orqanları 25 hüquq-mühafizə əməkdaşının həlak olduğunu bildirib. Tehran meri Əlirza Zakani deyib ki, etirazçılar paytaxtda 25 məscidi yandırıb, 26 bank, üç tibb mərkəzi, 10 dövlət müəssisəsi, 48 yanğınsöndürən maşın, 42 avtobus və təcili yardım maşını, həmçinin 24 mənzilə ziyan vurublar. İran hakimiyyəti iğtişaşçıları terrorist adlandırıb və hadisələrin təşkilində İsrail və ABŞ-ni təqsirləndirib.