Avropa ABŞ-ni məmnun etmək üçün Qrenlandiyanı verməyə razılaşa bilər

Bizi sosial şəbəkələrdən izləyin:

Belə bir risk mövcuddur ki, Avropa Vaşinqtonu məmnun etmək cəhdi kimi Qrenlandiyanı ABŞ-yə verməyə razı ola bilər.

Bu barədə "Bloomberg" agentliyi İsveçrənin Davos şəhərində Dünya İqtisadi Forumunda iştirak edən yüksəkvəzifəli məmura istinadən məlumat verib.

Məmurun sözlərinə görə, Avropada çox insan bu fikirlə razıdır ki, İkinci Dünya müharibəsindən sonra yaranan nizam sona çatıb və ABŞ Prezidenti Donald Tramp tərəfindən ərazilərin ələ keçirilməsi qlobal siyasəti dəyişdirəcək. Mənbə agentliyə narahatlığını ifadə edib ki, Avropa liderləri Ağ Evi sakitləşdirmək üçün növbəti cəhd olaraq Qrenlandiyanı ABŞ-yə verməyə razılaşa bilərlər.

"Bloomberg", həmçinin qeyd edir ki, avropalı məmurlar ABŞ-nin dəstəyinin itirilməsindən və Vaşinqtonun necə tez bir zamanda dostca yanaşmadan düşməncə yanaşmaya keçməsindən heyrətləniblər. Onlardan bəziləri etiraf ediblər ki, məntiqə zidd olan və daim dəyişən təhdidlər və tələblər axınına necə reaksiya verəcəklərini bilmirlər.

"ABŞ liderinin Danimarkadan dünyanın ən böyük adasını təhvil verməsini tələb etməsi, rüsumların tətbiqi ilə bağlı yeni təhdidlər və BMT ilə rəqabət aparan qlobal təhlükəsizlik forumu yaratmaq cəhdi cəmiyyətin həssas vaxtına təsadüf edib", - deyə materialda bildirilib.

Agentliyin qeyd etdiyi kimi, Ukraynadakı münaqişə səbəbindən onsuz da parçalanmış Avropa İttifaqı iqtisadi çətinliklərlə üzləşir və bir vaxtlar təməlini təşkil edən ABŞ təhlükəsizlik zəmanətlərinə nə dərəcədə etibar edə biləcəyindən əmin deyil.

"Bloomberg"in qeyd etdiyinə görə, belə bir hiss yaranır ki, hadisələr nəzarətdən çıxır, çünki heç nəyə baxmayaraq, Avropa Ağ Evlə yeni və daha düşmən münasibətlərə doğru irəliləyir. /Oxu.az/