"Gündə bir siqaret həqiqətən zərərsizdirmi?" - Həkimlər cavab verir

"Dozanı azaltmaq problemi həll etmir, ən düzgün yol tamamilə tərgitmək, daha yaxşısı isə heç vaxt başlamamaqdır..."

Bəzi insanlar gün ərzində cəmi 1-2 ədəd, bəziləri isə yalnız ara-sıra - dostlarla görüşdə və ya məclislərdə siqaret çəkir. Bu cür "yüngül siqaretçəkmə" həqiqətən də ağır siqaret çəkmək qədər təhlükəlidirmi? Tibb bu suala kifayət qədər aydın cavab verir.

Moderator.az xəbər verir ki, bu barədə "vesty.co" nəşri yazıb.

"Bir dənədir, nə olar ki?" - geniş yayılmış yanlış təsəvvür

Gündə bir siqaret. Bəzən yeməkdən sonra, bəzən dostlarla görüşdə, bəzən də sadəcə "istək gələndə". Bir çox insan bunu ciddi problem hesab etmir: nə öskürək var, nə təngnəfəslik, nə də dərhal hiss olunan narahatlıq. 

Lakin tibb zərəri hisslərə görə deyil, orqanizmdə baş verən proseslərə əsasən ölçür və bu proseslər bəzən elə ilk tüstüdən başlayır. Mütəxəssislər bildirir ki, "icazə verilən" siqaret miqdarı anlayışı mövcud deyil. Hətta az miqdarda siqaret çəkmək də zamanla səssiz, lakin real zərərlər yaradır.

Ağciyərlər və tənəffüs sistemi: zərər ilk tüstüdən başlayır

Ağciyər xəstəlikləri üzrə mütəxəssis, "Şiba" xəstəxanasının Tənəffüs Yolları Xəstəlikləri Mərkəzinin rəhbəri dr. Lior Saluk bildirir ki, siqaret tüstüsü ağciyərlərdə çökərək iltihabi proses yaradır. Bu proses zamanla ağciyər xərçəngi, xroniki obstruktiv ağciyər xəstəliyi (COPD), fibroz kimi ağır xəstəliklərə yol aça bilər.

Onun sözlərinə görə, siqaret təkcə ağciyərlərə deyil, astma kimi mövcud tənəffüs xəstəliklərinə də mənfi təsir göstərir. Qətranlar ağciyərlərin təmizlənmə mexanizmini pozur, nikotin isə asılılıq yaradır və insanı illərlə bu vərdişə bağlı saxlayır.

Araşdırmalar göstərir ki, özünü "sosial siqaret çəkən" adlandıran insanlar belə risk altındadır. Ayda cəmi 5-6 siqaret belə siqaretlə bağlı xəstəliklərin ehtimalını əhəmiyyətli dərəcədə artırır.

Ürək-damar sistemi: görünməyən, amma ciddi risk

Siqaretin zərəri yalnız ağciyərlərlə məhdudlaşmır. "Klalit" xəstəxana kassasının baş kardioloqu dr. İren Kruçin bildirir ki, siqaret damarların daxili qişasını zədələyir və aterosklerozun inkişafını sürətləndirir. Bu isə infarkt və insult riskini artırır.

Onun sözlərinə görə, hətta bir-iki siqaret belə damar spazmı, qanın laxtalanmasının pozulması və trombositlərin yapışması kimi prosesləri işə sala bilər. Bəzi hallarda bunun üçün cəmi bir tüstü kifayətdir. "Bir siqaretlə hər şey olmur, amma bir siqaret də zərər verir", - həkim vurğulayır.

Təhlükəsiz doza yoxdur

Söhbət gündə bir siqaretdən, həftədə bir neçə dəfədən və ya "yalnız məclislərdə" çəkməkdən getsə də, tibbi baxımdan fərq dəyişmir. Hətta minimal siqaret istifadəsi belə orqanizmdə zərərli mexanizmləri işə salır.

"Ən yaxşısı ümumiyyətlə siqaret çəkməməkdir", - dr. Saluk bildirir. - "Dozanı azaltmaq problemi həll etmir. Ən düzgün yol tamamilə tərgitmək, daha yaxşısı isə heç vaxt başlamamaqdır".

Dr. Kruçin də bu fikri bölüşür: "Nə bir, nə iki siqaret təhlükəsiz deyil. Siqaret ağciyərlərə, ürəyə, damarlara zərər verir və ağır, bəzən geri dönməz fəsadlara səbəb ola bilər".