"Şimali Afrikada ağ kölə qadınlar və Berber ticarəti" - "Sohu" (Çin)

"XVI-XIX əsrlərdə Berber bazarlarında bir at üç Avropa qadını ilə dəyişdirilirdi..."

XVI əsrdən XIX əsrin əvvəllərinə qədər Şimali Afrikada kölə ticarəti geniş yayılmışdı.

Moderator.az xəbər verir ki, bu barədə Çinin "sohu.com" nəşri yazıb.

Kölə ticarətinin yaranması və Berber piratları

Nəşr qeyd edir ki, Əlcəzair, Tunis və Tripolitaniyada piratlar Aralıq dənizində və sahil kəndlərində hücumlar edərək avropalıları əsir götürürdü. Tarixçi Robert Devisin hesablamalarına görə, bu dövrdə 1-1,25 milyon avropalı əsir bazarlara çıxarılmışdı.

Berber ticarətinin iqtisadi əsası əsirlərin satışından və onların əmək məhsuldarlığından gəlirdi. Piratlar və hakimlər qazancını paylaşır, onu hərbi və saray xərclərinə yönəldirdi.

Ağ qadınların ticarətdə üstünlüyü

Əsir qadınlar kişilərə nisbətən daha yüksək qiymətə satılırdı. XVII əsrdə Əlcəzair bazarında qadınlar 50 funt sterlinqə, kişilər isə 32 funt sterlinqə satılırdı. Xüsusilə şərqi Avropa qadınları - ukraynalı və polyak qadınlar bazarda ekzotik mallar kimi qəbul edilirdi. Bəzən bir at üç qadına dəyişdirilə bilirdi.

Kişi əsirlər əsasən ağır fiziki işlərdə istifadə olunur, çoxu aclıq, xəstəlik və ya işgəncə nəticəsində həyatını itirirdi. Qadın əsirlər isə saraylar və hərəmxanalar üçün alınırdı. Piratlar və Berber hakimləri qaçmağa çalışan əsirlərə sərt cəzalar tətbiq edirdi.

Avropanın müdaxiləsi və ticarətin sona çatması

XVIII əsrin sonlarında ABŞ və Avropa ölkələri Berber piratlarına qarşı hərbi əməliyyatlar başlatdı. 1801-1805-ci illərdə Birinci Berber müharibəsi ABŞ donanmasının Tripolini məğlub etməsi və əsirlərin azad olunması ilə nəticələndi.

1815-ci ildə İkinci Berber müharibəsi pirat gücünü daha da zəiflətdi. 1816-cı ildə İngiltərə Əlcəzairi bombardman edib 1200-dən çox əsiri azad etdi. XIX əsrdə Avropa müstəmləkə idarəsi Şimali Afrikada kölə ticarətini tamamilə dayandırdı və anti-kölə qanunları tətbiq etdi.