"Xartiya" Kupyanskda işğalçıları necə dayandırdı?" - "The Telegraph"

"Biznesdən cəbhəyə uzanan yol, "Xartiya metodu" və Kupyanskda dəyişən müharibə qaydaları..."

Ukraynanın Kupyansk şəhərinin müdafiəsi və azad edilməsində əsas rol oynayan hərbi birləşmələrdən biri "Xartiya" briqadası olub.

Moderator.az xəbər verir ki, bu barədə "thetelegraph.com" nəşri yazıb.

Nəşrin məlumatına görə, ukraynalı taxıl milyardçısı Vsevolod Kojemyako tərəfindən yaradılan bu briqada qısa müddətdə Ukraynanın dözümlülüyünün rəmzlərindən birinə çevrilib.

Tammiqyaslı müharibənin başlanmasından sonra Kojemyako həyatını köklü şəkildə dəyişib. Keçmiş biznesmen və marafonçu kostyumu hərbi forma ilə əvəz edib və bu gün "milyardçının briqadası" adlandırılan 13-cü "Xartiya" briqadasını yaradıb. Hazırda bu birləşmə Ukraynanın ən effektiv döyüş bölmələrindən biri hesab olunur.

Xarkovda zəif işıqlandırılmış bir hoteldə, tam döyüş sursatında olan Kojemyako "The Telegraph" nəşri ilə söhbəti zamanı fortepianoda Bethovenin "Eliza üçün" əsərini ifa edərək deyib:
"Bəli, mən biznesmenəm. Amma indi Ukraynada hərbi hissənin komandiriyəm".

Biznes tərəfindən maliyyələşən könüllülər

"Xartiya" 2022-ci ilin martında Kojemyakonun şəxsi vəsaiti və imkanlı donorların dəstəyi ilə mülki şəxslərdən ibarət könüllü dəstə kimi yaradılıb. İlkin mərhələdə Xarkov vilayətinin ərazi müdafiəsi tərkibində fəaliyyət göstərən bölmə sonradan Ukrayna Milli Qvardiyasının elit hücum briqadasına çevrilib.

Hərbi analitiklərin qiymətləndirməsinə görə, briqadanın şəxsi heyəti 1500-dən 5000 nəfərə qədər dəyişir. "Xartiya" sürətli əks-hücumlar, şəhər döyüşləri və pilotsuz uçuş aparatlarından geniş istifadə ilə seçilir. Kojemyako müharibənin ilk illərində deyib: "Müharibəbitəndən sonra biz yenidən mülki insanlar olacağıq".

Kupyansk üzərində Ukrayna bayrağı

Bu həftə "Xartiya" bölmələri bir neçə ay Rusiya ordusunun intensiv hücumlarına məruz qalan Kupyansk üzərində Ukrayna bayrağını qaldırıb. Şəhər bir müddət demək olar ki, itirilmiş hesab edilsə də, Ukrayna qüvvələri rus hərbçilərini böyük ölçüdə geri sıxışdırdıqlarını bildirib.

Kəşfiyyat məlumatlarına görə, Kupyansk uğrunda döyüşlərdə itkilərin nisbəti 1-ə 27 olub. Polkovnik İqor Obolenskinin sözlərinə görə, bu uğur düzgün planlaşdırma, hazırlıqlı komandirlər və keyfiyyətli bölmələrə əsaslanan, "Xartiya metodu" adlandırılan yanaşmanın nəticəsidir.

Əməliyyat zamanı briqada daha az təcrübəli hissələrlə koordinasiyalı şəkildə fəaliyyət göstərib, əsas zərbələr isə dəmir yolu qovşaqları və şəhərin strateji keçid nöqtələrinə endirilib. Artilleriya və dronlarla sıx qarşılıqlı əlaqə həlledici rol oynayıb.

Yanvarın 12-də Ukrayna Milli Qvardiyasının 2-ci korpusuna daxil olan "Xartiya" briqadası Kupyansk şəhər şurasının binasına nəzarəti ələ keçirib. Şəhərin tam təmizlənməsi istiqamətində əməliyyatlar davam edir.