"Qazzada texnokratlar hökuməti formalaşdırılır" - İsrail mətbuatı

"Texnokrat komissiyası Qəzzada sülhü və sabitliyi bərpa etməyə çalışacaq..."

ABŞ administrasiyası Qəzzadakı vəziyyətin yeni müharibəyə çevrilə biləcəyindən narahatdır.

Moderator.az xəbər verir ki, bu barədə "detaly.co" nəşri yazıb.

ABŞ və beynəlxalq ictimaiyyət yeni mərhələyə keçidi dəstəkləyir

Nəşr yazır ki, hazırkı planın ikinci mərhələsi HAMAS-ın silahsızlaşdırılmasını, İsrail ordusunun bölgədən çıxarılmasını və yeni yerli texnokrat idarəetmə strukturlarının hakimiyyətə gəlməsini nəzərdə tutur. Bu çərçivədə 14 yanvar tarixində ABŞ prezidenti administrasiyasının xüsusi nümayəndəsi Stiven Uitkoff Qəzzada yeni keçid hökumətinin formalaşdırılmasına başlanıldığını açıqlayıb.

Texnokrat komissiyasının strukturu və rəhbərliyi

Keçid administrasiyası yalnız Qəzza sakinlərindən ibarət olacaq. Ağ Ev nümayəndələri bildirib ki, namizədlər diqqətlə seçilib və yoxlanılıb. Məqsəd ölkədə sülhün bərqərar olması və xalq üçün şəraitin yaradılmasıdır. Qəzzanın texnokrat keçid hökumətinə rəhbərlik edəcək şəxs Əli Şaat olacaq.

O, əvvəllər Fələstin Administrasiyasında nazir müavini olub, sənaye zonalarının inkişafına cavabdeh olub, hazırda Ramallahda yaşayır. "Reuters" agentliyinin məlumatına görə, komissiya 14-15 nəfərdən ibarət olacaq və namizədlərin əksəriyyəti HƏMAS və Fələstin Administrasiyasından müstəqil mütəxəssislərdir. Bir qismi isə FATX ilə bağlıdır.

Texnokrat komissiyasına Fələstin "Sülh Şurası" tərəfindən nəzarət olunacaq. Şuranın rəhbəri ABŞ prezidenti Donald Tramp olacaq və ona bir neçə Qərb lideri daxil olacaq. Komissiyanın işini idarə etmək üçün BMT-nin keçmiş xüsusi elçisi, bolqar diplomatı Nikola Mladenov məsul olacaq. O, son günlər İsraildə baş nazir Benyamin Netanyahunu və Fələstinin yüksək vəzifəli nümayəndələrini ziyarət edib.

Beynəlxalq qüvvələr və diplomatik çətinliklər

Sülh planına uyğun olaraq Qəzzada beynəlxalq sabitləşdirici qüvvələrin yerləşdirilməsi planlaşdırılır. Bu kontingentdə misirli, azərbaycanlı, türkiyəli və indoneziyalı hərbçilər iştirak edəcək. Qüvvələr ağır silah daşımayacaq və əsas missiyaları sülhü təmin etmək, sahə xəstəxanaları yaratmaq, kritik infrastrukturu bərpa etmək və xilasetmə əməliyyatlarını idarə etməkdir. Təxminən 3 min yerli könüllü bu işlərdə iştirak edəcək.

Türkiyənin HƏMAS üzərindəki təsiri nəzərə alınaraq, Vaşinqton İsrail və Türkiyə arasında diplomatik səyləri gücləndirməyi planlaşdırır. Lakin İsrail Türkiyə hərbçilərinin iştirakına qəti etiraz edir. Hazırkı mərhələdə bəzi ölkələr, o cümlədən Azərbaycan və Türkiyə, beynəlxalq qüvvələrə qoşulmaqdan imtina edib. ABŞ rəsmiləri ümid edir ki, texnokrat komissiyanın formalaşması HƏMAS-ın Qəzzadakı təsirini azaldacaq və regionun sabitləşməsinə töhfə verəcək.