"Rusiyanın müttəfiqləri narazıdır: Putin onları "yarı yolda qoyub" - "Bloomberg"

"Rusiyanın strateji tərəfdaşları özlərini himayəsiz vədlərlə üz-üzə görür..."

Rusiya prezidenti Vladimir Putin diqqətini Ukraynaya qarşı müharibəyə cəmlədiyi bir vaxtda, Kremlin strateji müttəfiqləri Moskvadan real dəstək görmədiklərini bildirir.

Moderator.az xəbər verir ki, bu barədə "bloomberg.com" nəşri yazıb.

"Kağız pələng": təhlükəsizlik və tərk edilmiş müttəfiqlər

Nəşrin məlumatına görə, Venesuela rəsmiləri Rusiya ilə uzun illər davam edən təhlükəsizlik əməkdaşlığını artıq "kağız pələng" kimi dəyərləndirir. Vurğulanır ki, bu narazılıq təkcə Karakasla məhdudlaşmır, "son 13 ayda Dəməşqdən və Tehrandan tutmuş Havanaya qədər Kremlə yaxın avtoritar rejimlər ən çətin anda Rusiyanın dəstəyinin yetərli olmadığını gördülər". Qeyd olunur ki, Suriyada Rusiya hərbi dəstəyi zəiflədikdən sonra diktator Bəşər Əsəd Moskvaya qaçıb. Kuba isə himayədarsız qalaraq ciddi humanitar böhranla üzləşib.

Venesuela, HHM problemləri və etimadın sarsılması

Nəşr yazır ki, venesuelalı məmurlar Karakasın təhlükəsizliyində güvəndikləri Kuba və Rusiya kəşfiyyat strukturlarının prezident Nikolas Maduro üçün real təhdidləri vaxtında müəyyən edə bilməməsindən şikayətlənir. Eyni zamanda Rusiyanın C-300 və "Buk-M2" HHM sistemlərinin effektiv fəaliyyəti üçün yetərli texniki dəstək verilmədiyi bildirilir.

ABŞ kiberhücumlarından sonra Karakasın böyük hissəsində elektrik enerjisinin kəsilməsi də Moskvanın texniki imkanlarına inamı daha da azaldıb. Nəticədə Venesuela, Kuba və Rusiya arasında təhlükəsizlik tərəfdaşlığına etimad ciddi şəkildə sarsılıb.

ABŞ amili, İran istisnası və Ukrayna prioriteti

Məqalədə qeyd olunur ki, Madurodan sonra mümkün varis kimi göstərilən Delsi Rodriges ABŞ-la əməkdaşlıq təkliflərini qəbul etməyə və keçmiş tərəfdaşlarla əlaqələri zəiflətməyə məcbur qalıb. Mənbələrə görə, Rusiya rəsmiləri Donald Trampın Maduronun ələ keçirilməsi ilə bağlı xüsusi əməliyyatından narazı qalsa da, hazırda Moskva üçün Vaşinqtonla münasibətlər Karakasdan daha önəmlidir.

İran məsələsi isə istisna hesab olunur. Moskva ilə Tehran arasında, o cümlədən hərbi sahədə əməkdaşlıq daha dərin xarakter daşıyır. Bununla belə, nəşrin mənbələri bildirir ki, Rusiya açıq dəstək versə də, məhdud imkanlar və Ukraynaya qarşı müharibənin prioritet olması səbəbindən İrana aktiv yardım ehtimalı azdır.

Məqalənin sonunda vurğulanır: "Bu, Rusiyanın digər strateji tərəfdaşlıqları üçün də yaxşı heç nə vəd etmir və Kremlin Ukraynada bütün məqsədlərinə danışıqlar masasında güzəştsiz nail olmağa daha çox önəm verdiyini göstərir. Bu isə Tramp üçün çətin sülh razılaşmasını əldə etməyi daha da mürəkkəbləşdirə bilər".