"İki boss dünyanı bölür: Putin və Trampın gücü bir çox regionun taleyini həll edəcək" - "Politico"

"ABŞ-ın Venesuelaya hücumu Rusiyanın maraqlarına uyğun yeni dünya nizamı yaratdı..."

ABŞ-ın Venesuelada keçirdiyi əməliyyat və Qrenlandiya ilə bağlı iddiaları beynəlxalq hüququn deyil, gücün həlledici olduğunu açıq şəkildə nümayiş etdirdi.

Moderator.az xəbər verir ki, bu barədə "politico.com" nəşri yazıb.

Nəşr yazır ki, bu yanaşma Kreml üçün əlverişli görünür və Ukrayna münaqişəsinin qarşılıqlı güzəşt əsasında "razılaşma" ilə həllini mümkün ssenariyə çevirir.

Venesuela və Kremlin gözlənilməz sakitliyi

ABŞ-ın Venesuelada həyata keçirdiyi sərt əməliyyata Moskvanın reaksiyası gözlənildiyindən xeyli təmkinli oldu. Rusiya Xarici İşlər Nazirliyi əməliyyatı standart ifadələrlə pislədi, Dmitri Medvedev onu "qanunsuz" adlandırdı, lakin çıxışlarda ABŞ prezidentinin qətiyyətinə qarşı gizli heyranlıq da hiss olunurdu. Vladimir Putin isə keçmiş müttəfiqi Nikolas Maduronun taleyi ilə bağlı ümumiyyətlə açıqlama vermədi.

Bu sakitlik təsadüfi deyil. 2005-ci ildən bəri Rusiya ilə Venesuela arasında sıx hərbi və maliyyə əlaqələri mövcud olub, Moskva Karakasa milyardlarla dollar kredit və silah verib. Buna baxmayaraq, Kreml bu dəfə münasibətləri gərginləşdirmək əvəzinə susmağı üstün tutdu. Müşahidəçilərə görə, Moskva Venesuelanı Vaşinqtonla daha böyük geosiyasi sövdələşmədə alət kimi görür.

Ukrayna fonunda güc nümayişi və narahatlıq

Kreml açıq qarşıdurmadan qaçır, çünki ABŞ-ın Venesueladakı sürətli əməliyyatı Rusiyanın Ukraynada illərdir davam edən müharibəsi ilə kəskin ziddiyyət təşkil edir. Vaşinqton bir neçə saatda rejimi zərərsizləşdirdiyi halda, Moskva dörd ilə yaxındır hədəfinə çata bilmir.

Bu durum Rusiyanın daxilində də qıcıq yaradıb. Ultra-millətçi dairələr ABŞ-ın sərt güc tətbiqinə açıq heyranlıq göstərir və Kremlə eyni üsullarla davranmağı tövsiyə edirlər. Lakin məhz bu müqayisə Rusiyanın real imkanlarının məhdudluğunu üzə çıxardığı üçün rəsmi Moskva mövzunu qabartmaq istəmir.

Yeni dünya qaydası və "gəlin, sövdələşək" məntiqi

Ekspertlər hesab edir ki, ABŞ əməliyyatı Kreml üçün gözlənilməz şəkildə faydalı nəticələr də yaradıb. Diqqət Ukraynadan yayınır, Putinə təzyiq azalır və ən əsası, güc tətbiqi milli maraqların legitim müdafiə vasitəsi kimi təqdim olunur. Bu isə "qaydalara əsaslanan dünya nizamı" anlayışını zəiflədir.

Amerikalı ekspert Fiona Hillin fikrincə, Moskva Trampın Venesueladakı addımını presedent kimi istifadə edəcək və bildirəcək ki, ABŞ öz "həyətində" gücdən istifadə edirsə, Rusiya da yaxın xaricdə eyni hüquqa malikdir. Bu mənzərə iki mafioz bossun dünyanı təsir dairələrinə bölməsi təəssüratı yaradır.

"Politico"-nun yekun qənaətinə görə, Kreml üçün əsas qazanc Maduronun devrilməsi yox, Tramp administrasiyasının gücü hüquqdan üstün tutan yanaşmanı faktiki olaraq legitimləşdirməsidir. Bu dili Putin yaxşı anlayır. Məntiq sadədir: "gəlin, sövdələşək" və bu sövdələşmənin növbəti mövzusu artıq təkcə Venesuela deyil.