ABŞ startapı Ayda hotel tikməyi planlaşdırır

Kaliforniya ştatının San-Fransisko şəhərində yerləşən "GRU Space" startapı Ayda ilk hotellərin tikilməsi planlarını açıqlayıb. 2032-ci ildən etibarən ora turist göndərilməsi planlaşdırılır.

Moderator.az-ın məlumatına görə, bu barədə şirkətin veb-saytında bildirilir.

Şirkət məqsədlərini son illərdə "SpaceX" sayəsində orbitə yük buraxılması qiymətinin əhəmiyyətli dərəcədə azalması ilə əsaslandırır.

"Müştərilər "SpaceX" və ya "Blue Origin" provayderlər tərəfindən idarə olunan lisenziyalı kommersiya nəqliyyat vasitələrində uçacaqlar, GRU isə Ay səthindəki uçuş proqramını və əməliyyatlarını əlaqələndirəcək. Biz təlim və tibbi müayinəni tərəfdaş standartlarına uyğunlaşdıracaq, missiya hazırlığını, uçuş planlaşdırmasını təmin edəcəyik", - deyə şirkət iddia edir.

İlkin mərhələlərdə hotellər turistlərlə birlikdə Ay səthinə çatdırılacaq: bunlar iki-dörd nəfər üçün nəzərdə tutulmuş şişmə modullar olacaq. Şirkət iddia edir ki, ildə üç uçuş nəzərdə tutulsa, hər turist üçün xərc 416 000 dollar olacaq. Daha sonra həm Yer kürəsindən, həm də Ay səthindən materiallardan istifadə edərək daha mürəkkəb konstruksiyaların hazırlanması planlaşdırılır. San-Fransiskodakı İncəsənət Sarayının dizaynını xatırladacaq hotellər 10 qonağı qəbul edə biləcək və "göndəriş"lərin qiyməti potensial olaraq 83 000 dollara düşə bilər. Texnologiyanı sınaqdan keçirmək üçün hazırlıq uçuşları 2029 və 2031-ci illər üçün planlaşdırılır.