ABŞ altı ölkə ilə miqrantları qəbul etmək barədə razılığa gəldi

Karib hövzəsi ölkələri Birliyinin (CARICOM) altı dövləti - Antiqua və Barbuda, Beliz, Dominika, Qayana, Sent-Kits və Nevis və Sent-Lyusiya rəsmi Vaşinqtonla məhdud sayda qanunsuz miqrantı qəbul etmək barədə razılığa gəliblər.

Moderator.az xəbər verir ki, bu barədə ABŞ-nin "Miami Herald" nəşri məlumat yayıb.

Məlumata görə, yuxarıda adı çəkilən ölkələrin hamısı miqrantları qəbul etmək üçün öz şərtlərini müəyyənləşdirib. Xüsusilə, Antiqua və Barbuda hökuməti deportasiya edilənlərin ABŞ qanunlarına əsasən qaçqın statusuna, təmiz cinayət tarixçəsinə və ingilis dilinin əsas biliklərinə malik olmasını tələb edir.

Ən son razılığa gələn ada ölkələri Sent-Kits və Nevis və Sent-Lyusiya olub. Sent-Lyusiya Baş naziri Filip Pyer qərarı açıqlayaraq bildirib ki, ölkəsi ABŞ ilə "məcburi olmayan anlaşma memorandumu" imzalayıb və buna əsasən, Tramp Administrasiyası tərəfindən deportasiya edilən "üçüncü ölkə vətəndaşlarını" potensial olaraq qəbul edə bilər.

Nəşrin məlumatına görə, Sent-Kits və Nevis hakimiyyəti yalnız 15 ölkədən ibarət CARICOM miqrantlarını qəbul etməyə razılıq verib. Adalar bu cür miqrantların cinayət qeydləri olmadığı müddətcə onları qəbul etməyə hazırdırlar. Digər bir şərt isə, ölkənin CARICOM üzvü olmasına baxmayaraq, Haiti vətəndaşı olmamasıdır. Baş nazir Terrens Dryu Haitinin siyahıdan çıxarılmasını "təhlükəsizlik problemləri" ilə əlaqələndirib.

ABŞ prezidenti kimi ikinci müddətə seçiləndən əvvəl Donald Tramp ölkəyə təxminən 25 milyon insanın qanunsuz daxil olduğunu bildirib. ABŞ lideri, həmçinin dəfələrlə daha sərt immiqrasiya siyasəti üçün çıxış edib. Andiçmədən sonra o, ABŞ-Meksika sərhədində fövqəladə vəziyyət elan edib və ölkənin tarixində qanunsuz immiqrantların ən böyük deportasiya əməliyyatını həyata keçirmək niyyətində olduğunu bildirib.