"Flaminqo"nun uçuşu Rusiyanın "təhlükəsiz dərinlik" mifini sarsıdır" - "The Wall Street Journal"

"Ukrayna dərinliyə vurmaq üçün hazırladığı yeni silah Rusiyanın əsas üstünlüyünü hədəfə alır..." 

Ukrayna ilk dəfə olaraq Rusiyanın ərazi dərinliyindəki hədəfləri müstəqil şəkildə vura biləcək uzaqmənzilli raket üzərində işləyir. 

Moderator.az xəbər verir ki, bu barədə "The Wall Street Journal" nəşri yazıb.

Rusiyanın "təhlükəsiz arxa cəbhəsi" sual altında

Nəşr qeyd edir ki, söhbət "Flaminqo" adlı yeni qanadlı raketdən gedir - onun uğurlu tətbiqi müharibədə qüvvələr balansını ciddi şəkildə dəyişə bilər. Nəşrin məlumatına görə, "Flaminqo" raketi böyük yanacaq bakı sayəsində 1800 mildən (təxminən 2900 km) artıq məsafəni qət edə bilir.

Bu göstərici onu Rusiyanın "Kalibr" və X-101 raketləri ilə eyni səviyyəyə çıxarır. Nəşr qeyd edir ki, Ukrayna üçün bu, təkcə yeni silah deyil,  həm də Qərbdən asılılığın azalması və Rusiyanın əsas strateji üstünlüyü olan "geniş ərazi dərinliyi"nin neytrallaşdırılması deməkdir.

Məhdud büdcə, maksimum improvizasiya

"Flaminqo" raketi Ukraynanın "Fire Point" adlı şirkəti tərəfindən hazırlanır. Layihə ciddi maliyyə məhdudiyyətləri şəraitində həyata keçirilir: bahalı "stealth" texnologiyaları və mürəkkəb vizual idarəetmə sistemləri yoxdur.

Mühəndislər uçuş idarəetməsi üçün açıq mənbəli proqram təminatından istifadə ediblər, reaktiv mühərriklər isə köhnə sovet təyyarələrindən götürülüb. Şirkət bildirir ki, indiyədək 100-dən az sınaq buraxılışı olub, lakin hər uçuşdan sonra konstruktor dəyişiklikləri aparılır.

Rusiya üçün prioritet hədəf

"Fire Point"-in sürətlə genişlənməsi onu Rusiya üçün birbaşa hədəfə çevirib. Nəşr yazır ki, şirkətin obyektləri artıq iki dəfə raket zərbələrinə məruz qalıb. Bu səbəbdən istehsal zəncirinin hər bir əsas halqasının "ehtiyat surəti" mövcuddur və hücum halında dərhal işə salınır.

Şirkət istehsal həcmini açıqlamasa da, gündə yeddi "Flaminqo" raketi istehsal etməyi planlaşdırdığını bildirir. Texniki direktor İrina Terexin sözlərinə görə, hər raket Ukrayna Silahlı Qüvvələri üçün fərdi sifarişlə hazırlanır və yığım tamamlandıqdan sonra iki gün ərzində istifadəyə hazır olur.

"Zərbə zəmanəti yox, təhlükə zəmanəti"

Oslo Universitetindən raket texnologiyaları üzrə ekspert Fabian Hoffmann hesab edir ki, "Flaminqo"nun əsas üstünlüyü mütləq dəqiqlik deyil, daimi təhdid effektidir: "Onlar hər zərbəyə zəmanət vermirlər. Amma bu hədəflər üçün daimi təhlükə yaradırlar. Və bu təhlükənin özü belə düşmənə zərər vurur".

Rusiya Ukraynanı qaranlıqda saxlamaq üçün "Shahed"lər və "Oreshnik"lərlə hücum edir. Ukrayna isə cavab olaraq işıq dirəklərinə yox, xəritəyə baxır və "Flaminqo" ilə bu xəritədə artıq "çatılmaz" nöqtələr qalmaya bilər. Müharibədə bəzən ən təhlükəli silah partlayan deyil, uçan ehtimaldır.