"Gələcəyə iti baxış: eynək istifadəçiləri üçün sevindirici xəbər" - CNN

"Yeni "ağıllı" eynəklər gənc görmə hissini geri qaytarmağı vəd edir..."

Finlandiyanın IXI şirkəti "ağıllı" eynəklərin istehsalına hazırlaşır. Xarici görünüşcə adi eynəklərdən fərqlənməyən bu cihazlar insanın baxış istiqamətini izləyərək fokuslanmanı avtomatik tənzimləyir. 

Moderator.az xəbər verir ki, bu barədə CNN telekanalı məlumat yayıb.

Avtofokuslu eynəklər: gələcəyin texnologiyası

Məlumatda deyilir ki, eynəklərdə göz izləmə sensorları və optik xüsusiyyətlərini saniyələr içində dəyişə bilən maye kristal linzalar quraşdırılıb. Şirkət bildirir ki, bu texnologiya bi-fokal və multi-fokal eynəklərdən bir addım öndədir. Klassik bi-fokal linzalar uzaq və oxuma üçün ayrı zonalara malikdir, multi-fokal linzalarda isə zonalar arasında hamar keçid olsa da, hələ də düzgün hissədən baxmaq tələb olunur.

IXI-nin baş direktoru Niko Eydən izah edir ki, ənənəvi linzalarda periferik görmə pozulur, istifadəçi daim baxışını nəzarətdə saxlamalı olur. IXI isə sabit fokus zonalarından imtina edib: "Bizim eynəklərdə oxuma zonası daha geniş və optimal yerdə yerləşir, lakin çox vaxt bu zona demək olar ki, yox olur və bütün linza uzaq baxış üçün işləyir. Beləliklə, uzağa baxanda görmə tam sahə ilə mümkündür - elə gənclik illərində olduğu kimi".

Maye kristallar və elektronika

IXI-də təxminən 75 nəfər çalışır, ümumi investisiya 40 milyon dollardan çoxdur. Eydənin sözlərinə görə, avtofokuslu eynəklər növbəti il satışa çıxacaq və adi eynəklərdən baha olacaq: "Mövcud eynəklərin ən yüksək qiymət seqmentində olacağıq".

Eyni zamanda, eynəklərin batareya ilə işləyəcəyi vurğulanır. Maqnitli şarj portu sapın içində gizlədilib və cihaz gecə şarj ediləcək. Elektronika eynəklərin görünüşünə az təsir edir: prototiplər sadəcə 22 qramdır və adi eynəklərlə asanlıqla qarışdırıla bilər.

Bəzi vizual pozuntular ola bilər: linzada "qarışıq zona" mövcuddur, kənar hissələrdə maye kristal bitdikcə baxış bir qədər xoş olmaya bilər. Lakin oxuma üçün mərkəzi sahə kifayət qədər genişdir və pozuntular çox hallarda nəzərə çarpmır.

Eynəklər əlavə testlərdən keçirilir ki, sürücülük zamanı təhlükəsizlik təmin edilsin. Elektronika sıradan çıxarsa, linzalar avtomatik baza vəziyyətinə - adətən uzaq baxış üçün korreksiyaya qayıdır.

Baxışın izlənməsi və gələcək perspektivlər

Göz hərəkətini fotodiodlar və LED-lər izləyir. Gözlərdən əks olunan görünməz infraqırmızı işıq vasitəsilə fokus müəyyən edilir. IXI eynəkləri gündəlik istifadəyə uyğun hazırlayır, amma hansı şəraitdə optimal işləyəcəyi hələ dəqiqləşdirilməyib.

Mançester Universitetinin neyrobiologiya üzrə professoru İan Mürrey ideyanı perspektivli hesab edir, lakin ilkin mərhələdə eynəklərin daha çox niş məhsul olacağını bildirir: "Fizika baxımından bu tam həyata keçirilə biləndir", - o, CNN-ə açıqlamasında bildirib və əlavə edib ki, geniş görmə sahəsi və zəif işıqda işləmə ilə bağlı suallar qalır.

Rəqabət və istehsal planları

Oxşar texnologiyalar digər şirkətlər, məsələn, Yaponiya şirkəti "Elcyo" tərəfindən hazırlanır,  "Vixion" isə artıq avtofokuslu eynəklər satır, amma onlar qeyri-adi görünür və kiçik pəncərələrdən baxmaq tələb olunur.

IXI eynəkləri Finlandiyada istehsal olunacaq. İlk olaraq Avropada satışa çıxacaq, regulator icazəsindən sonra ABŞ-da FDA icazəsi alınacaq və digər bazarlara çıxış planlaşdırılır. Başlanğıcda müştərilərə yalnız "iki-üç fərqli enlikdə çərçivə" təklif olunacaq.

Eyden yeni texnologiyanı fotoaparatlarda avtofokusun yaranmasına bənzədir: "Eynək sənayesi demək olar ki, dəyişməyib. Multi-fokal linzalardan sonra əsas yenilik olmayıb. Biz bunu dəyişmək istəyirik. 10-15 ildən sonra insanlar təəccüblənəcək: necə olub ki, biz sabit fokuslu eynək taxmışıq?"