"Kreml insan tələfatı ilə nəticələnəcək genişmiqyaslı təxribat hazırlayır" - Ukrayna Xarici Kəşfiyyat Xidməti

"Sülh ritorikasının arxasında gizlənən təxribat təhlükəsi bölgəni yeni, daha qanlı mərhələyə sürükləyə bilər..."

Ukrayna Xarici Kəşfiyyat Xidmətinin xəbərdarlığına görə, Kreml ABŞ-ın vasitəçiliyi ilə aparılan mümkün sülh danışıqlarını pozmaq məqsədilə insan tələfatı ilə nəticələnəcək genişmiqyaslı təxribat hazırlayır.

Moderator.az xəbər verir ki, bu barədə "uatv.ua" nəşri məlumat yayıb.

Kəşfiyyat məlumatlarında bildirilir ki, bu plan ya pravoslav təqvimi ilə Milad ərəfəsində, ya da bayram günlərində həyata keçirilə bilər. Xidmətin açıqlamasında qeyd olunur ki, Moskva son dövrlər informasiya manipulyasiyasından açıq silahlı təxribat mərhələsinə keçməyə hazırlaşır. 

Xüsusilə, guya "Putinin iqamətgahına hücum" iddiasından sonra Rusiya auditoriyasını və beynəlxalq ictimaiyyəti yeni eskalasiyaya psixoloji baxımdan hazırlamaq üçün saxta məlumatların dövriyyəyə buraxıldığı vurğulanır. Kəşfiyyat "yüksək ehtimalla" Rusiya xüsusi xidmət orqanlarının böyük insan itkisi ilə müşayiət olunan silahlı təxribata əl ata biləcəyini bildirir.

"Başqasının bayrağı altında terror" - Kremlin tanış metodu

Ukrayna kəşfiyyatına görə, təxribat üçün yüksək simvolik dəyəri olan obyekt - dini məkan və ya ictimai əhəmiyyətli bina seçilə bilər. Hadisəyə Ukraynanın cəlb olunması üçün isə rus tərəfi Qərb istehsalı olan zərbə dronlarının qalıqlarından istifadə etməyi planlaşdırır, bu qalıqların cəbhə xəttindən əvvəlcədən daşındığı bildirilir.

Xarici Kəşfiyyat Xidməti açıq şəkildə qeyd edir ki, qorxunun istismarı və "yalançı bayraq" altında terror aktları Rusiya xüsusi xidmətlərinin klassik iş üslubudur. Bu taktikanın daha əvvəl Rusiyanın öz daxilində dəfələrlə tətbiq olunduğu, indi isə açıq şəkildə xaricə ixrac edildiyi vurğulanır. Rəsmi Moskvanın yüksək vəzifəli şəxslərinin son bəyanatları da bu ssenarinin real təhlükə olduğunu dolayı yolla təsdiqləyir.

Qorxu, qeyri-müəyyənlik və cəmiyyətin dözümlülük həddi

Bu fonda Ukrayna cəmiyyətində müharibənin bitmə vaxtı ilə bağlı bədbinlik dərinləşir. Kiyev Beynəlxalq Sosiologiya İnstitutunun son sorğusuna əsasən, ukraynalıların yalnız kiçik bir hissəsi müharibənin 2026-cı ilin ilk yarısında bitəcəyinə inanır, hər üçüncü respondent isə ümumiyyətlə bu suala cavab verməkdə çətinlik çəkir. Buna baxmayaraq, əhalinin əksəriyyəti müharibənin nə qədər davam etməsindən asılı olmayaraq dözməyə hazır olduğunu bildirir.

Ekspertlər hesab edir ki, Kremlin mümkün təxribatları təkcə hərbi eskalasiya riski daşımır, eyni zamanda psixoloji müharibənin bir hissəsidir. Məqsəd həm Ukraynanın daxilində ruh düşkünlüyü yaratmaq, həm də beynəlxalq səviyyədə sülh prosesini iflic vəziyyətinə salmaqdır. Bu mənada yaxın həftələr təkcə cəbhə xətti üçün deyil, diplomatik meydan üçün də həlledici ola bilər.