"Kiril Budanov Prezident Ofisinin rəhbəri oldu: Zelenskinin təhlükəsizlik yönümlü seçimi" - Ukrayna mətbuatı

"Kəşfiyyat təcrübəsi siyasi mərkəzə daşınır, Prezident Ofisi isə müharibə dövrünün qərargahına çevrilir..."

Ukrayna prezidenti Vladimir Zelenski Baş Kəşfiyyat İdarəsinin (BKİ) rəhbəri Kiril Budanova Prezident Ofisinə rəhbərlik etməyi təklif edib və Budanov bu təklifi qəbul edib. 

Moderator.az xəbər verir ki, bu barədə "unn.ua" nəşri məlumat yayıb.

Zelenski bu barədə "Telegram kanal"ında yazaraq bildirib ki, ölkənin mövcud mərhələdə əsas prioriteti təhlükəsizlik, Müdafiə və Təhlükəsizlik Qüvvələrinin inkişafı, eləcə də diplomatik proseslərin koordinasiyasıdır. Prezidentin sözlərinə görə, Ofis bundan sonra məhz bu strateji istiqamətlərə xidmət edəcək və Budanov bu sahələr üzrə xüsusi təcrübəyə, eləcə də nəticə əldə etmək üçün yetərli iradəyə malikdir.

Təhlükəsizlik mərkəzli yeni idarəetmə modeli

Zelenski qeyd edib ki, yeni rəhbərə Milli Təhlükəsizlik və Müdafiə Şurasının katibi və digər aidiyyəti qurumlarla birgə Ukraynanın müdafiə və inkişaf strategiyasını yeniləmək və təsdiq üçün təqdim etmək tapşırılıb. Bu, Prezident Ofisinin klassik siyasi-koordinasiya rolundan daha çox, birbaşa təhlükəsizlik və müharibə idarəçiliyinə fokuslanacağını göstərir.

Budanov isə öz növbəsində bu vəzifəni "ölkə qarşısında daha bir məsuliyyət xətti" kimi dəyərləndirib. O, Ukraynaya xidmətini davam etdirdiyini, bu postun onun üçün həm şərəf, həm də ağır məsuliyyət olduğunu vurğulayıb və keçmiş silahdaşlarına, BKİ komandasına təşəkkür edib.

Yermakın gedişi və korrupsiya kölgəsi

Prezident Ofisindəki bu dəyişikliklər 28 noyabr 2025-ci ildə Andrey Yermakın istefasından sonra baş verib. İstefaya qədər Ukraynada energetika sahəsində genişmiqyaslı korrupsiya sxemi ilə bağlı NABU və SAP tərəfindən aparılan 15 aylıq istintaq gündəmdə olub.

"Midas" adlandırılan bu işdə strateji dövlət müəssisələrinə təsir mexanizmləri araşdırılıb. Həmin gün Yermakın evində istintaq hərəkətləri aparılıb, elə həmin tarixdə onun vəzifədən azad olunması ilə bağlı prezident fərmanı dərc edilib. Zelenski isə Prezident Ofisinin "yenidən yüklənəcəyini" vəd edib.

Budanov: kəşfiyyatdan Prezident Ofisinə

Kiril Budanov 2020-ci ilin avqustundan BKİ-yə rəhbərlik edib və Ukrayna tarixində ən gənc hərbi kəşfiyyat rəhbəri kimi tanınır. Donbasda döyüşlərdə iştirak edib, bir neçə dəfə ağır yaralanıb, çoxsaylı məxfi əməliyyatlara rəhbərlik edib. Onun adı həm Rusiyanın mümkün genişmiqyaslı işğalı barədə erkən xəbərdarlıqlarla, həm də Rusiya ərazisi və Krımdakı əməliyyatlarla bağlı səslənib.

Budanov dəfələrlə sui-qəsd cəhdlərinin hədəfi olub, Rusiya tərəfindən "terrorçu" və "ekstremist" siyahısına salınıb. 2023-cü ildə isə general-leytenant rütbəsi alıb. Yeni təyinat Budanovun hərbi-kəşfiyyat təcrübəsinin birbaşa dövlətin siyasi-idarəetmə mərkəzinə daşındığını göstərir. Bu isə Ukraynanın müharibə şəraitində Prezident Ofisinin klassik bürokratik qurumdan daha çox, təhlükəsizlik qərargahına çevirdiyinin açıq siqnalıdır.