"Milad gecəsi Rusiyanın enerji və hərbi infrastrukturu vuruldu" - Ukrayna KİV-ləri

"Hədəfdə strateji obyektlər - yanacaq, qaz və ağır silah sistemləridir..."

Milad gecəsi Rusiyanın dərin arxa cəbhəsində bir neçə strateji obyekt eyni vaxtda hücuma məruz qalıb. Hədəflər arasında enerji infrastrukturu, hərbi aerodrom və ağır silah sistemləri olub.

Moderator.az xəbər verir ki, bu barədə "informator.ua" nəşri məlumat yayıb.

Temryuk limanı və Orenburq qaz zavoduna zərbələr

Məlumata görə, Ukrayna Təhlükəsizlik Xidmətinin (UTX) "Alfa" xüsusi əməliyyatlar mərkəzinə məxsus uzaqmənzilli pilotsuz uçuş aparatları Krasnodar diyarında yerləşən Temryuk dəniz limanını vurub. Hücum nəticəsində limanda neft məhsulları saxlanılan iki rezervuar yanmağa başlayıb, yanğın sahəsi təxminən 2 min kvadratmetr olub.

Bundan əlavə, Orenburq qaz emalı zavodu da hücuma məruz qalıb. Bildirilir ki, dünyada ən iri qaz-kimya komplekslərindən biri sayılan bu müəssisədə qazın təmizlənməsi qurğusunun boru xəttində yanğın baş verib və texnoloji proses tamamilə dayandırılıb. Yanğınlar beynəlxalq FIRMS monitorinq xidməti tərəfindən də qeydə alınıb.

Neftayırma zavodu, hava limanı və "Solntsepyok"un məhv edilməsi

Ukrayna Silahlı Qüvvələrinin Baş Qərargahı isə Rostov vilayətində yerləşən Novoşaxtinsk neft məhsulları zavoduna "Storm Shadow" qanadlı raketləri ilə zərbə endirildiyini açıqlayıb. Müəssisədə çoxsaylı partlayışlar qeydə alınıb. Zavod Rusiya ordusunu dizel yanacağı və aviasiya kerosini ilə təmin edən əsas obyektlərdən biri hesab olunur.

Eyni zamanda Adıgey Respublikasında Maykop yaxınlığındakı hərbi hava limanında yanğın baş verdiyi bildirilib. Ayrı bir əməliyyat zamanı isə Ukrayna Milli Qvardiyasının bölmələri pilotsuz uçuş aparatlarının köməyi ilə Rusiyaya məxsus TOС-1A "Solntsepyok" ağır odsaçan sistemini məhv edib. Təxminən 8 milyon dollar dəyərində olan bu sistem ön xətdə Ukrayna mövqelərinə qarşı istifadə olunurdu.