"Orqanizm təhlükəli xəstəliklərin inkişafı barədə bizə necə "siqnal verir" - Həkimlərdən açıqlama

"Xəstəliklər başlamazdan əvvəl bədənin verdiyi xəbərdarlıqlar..."

İnsan orqanizmi susmur. Daxili orqanların və sistemlərin fəaliyyətində hər hansı pozuntu baş verdikdə, bədən bunu müxtəlif "işarələrlə" bizə çatdırır.

Moderator.az xəbər verir ki, bu barədə "Daily Mail" nəşri yazıb.

Həkimlər vurğulayır ki, bu erkən siqnalların vaxtında tanınması ağır fəsadların qarşısını almağa, qidalanma və həyat tərzini düzgün istiqamətdə dəyişməyə imkan verir.

Balıq yeməyə qəfil istək - sadə kapriz deyil

Balığa və dəniz məhsullarına artan maraq çox zaman qalxanabənzər vəzin fəaliyyəti ilə bağlı problemlərə işarə edir. Bunun əsas səbəbi yod çatışmazlığıdır. Yod maddələr mübadiləsini tənzimləyən hormonların sintezi üçün həyati əhəmiyyət daşıyır. Xüsusilə hipotiroidizm zamanı bu cür istək daha kəskin hiss olunur.

Əlavə olaraq, balığa meyl mədə və ya qaraciyərdə gedən iltihabi proseslərlə də əlaqəli ola bilər. Belə hallarda orqanizm bərpa üçün daha çox zülal və mikroelement tələb edir. Omega-3 yağ turşularının antiinflamator təsiri də bu seçimi şərtləndirə bilər.

Turş dadlara meyl - sidik kisəsinin xəbərdarlığı

Əgər qəfil turş kələm, limon, sirkəli salatlar yemək istəyi yaranıbsa, sidik-ifrazat sisteminə diqqət yetirmək lazımdır. Bu cür qida davranışı tez-tez sidik kisəsinin iltihabı və ya orqanizmdə turşu-qələvi balansının pozulması ilə əlaqələndirilir. Bəzi hallarda bu, gizli gedən sistitin və ya böyrəklərin yüngül funksional gərginliyinin ilk əlaməti ola bilər.

Şirniyyata qarşı güclü istək - qan şəkərini yoxlatdırmaq vaxtıdır

Daim şokolad, peçenye və ya şirniyyat yemək istəyi qanda qlükozanın azalmasına işarə edə bilər. Bu vəziyyət insulinrezistentlik, prediabet və ya qeyri-sabit qidalanma fonunda yaranır. Mütəxəssislər bu ehtiyacı sağlam alternativlərlə kompensasiya etməyi məsləhət görürlər: xurma, qurudulmuş giləmeyvə, az miqdarda bal və ya meyvə. Bir qəlyanaltının 100 kaloridən çox olmaması tövsiyə edilir ki, şəkər səviyyəsində kəskin sıçrayışlar baş verməsin.

Diş ətlərinin qanaması - C vitamini çatışmazlığı

Diş ətlərinin tez-tez qanaması çox zaman askorbin turşusunun çatışmazlığı ilə bağlı olur. Vitamin C damarların möhkəmlənməsində, immun müdafiənin gücləndirilməsində mühüm rol oynayır. Bununla yanaşı, ağız boşluğu gigiyenasının zəif olması da bu əlaməti gücləndirə bilər. Rasiona bolqar bibəri, qara qarağat, kivi və turş kələm əlavə etmək tövsiyə olunur - bunlar C vitamininin ən zəngin mənbələridir.

Yuxusuzluq və narahat yuxu - maqnezium və kalium azlığı

Yuxuya getməkdə çətinlik, gecə tez-tez oyanmalar və daxili gərginlik hissi çox zaman maqnezium və kalium çatışmazlığı ilə əlaqələndirilir. Bu mikroelementlər sinir sisteminin tarazlığı və ürək ritminin stabil qalması üçün vacibdir.
Bișmiş çuğundur, qaysı qurusu, qoz və badam, ispanaq və banan bu ehtiyacı təbii yolla qarşılamağa kömək edir.

Quru və solğun dəri - E vitamin çağırışı

Dərinin qabıqlanması, elastikliyini itirməsi və tutqun görünməsi orqanizmdə E vitamini - tokoferol çatışmazlığının göstəricisi ola bilər. Bu vitamin güclü antioksidantdır və hüceyrələri erkən qocalmadan qoruyur.
Avokado, zeytun və kətan yağı, badam və sobada bişmiş şirin kartof dərinin sağlamlığını bərpa etmək üçün xüsusilə faydalıdır.

Orqanizmin digər gizli qida siqnalları

- Buzu çeynəmək istəyi çox vaxt dəmirdefisitli anemiyanın əlaməti olur.

- Yağlı və qızardılmış yeməklərə güclü meyl yağda həll olan A, D, E və K vitaminlərinin çatışmazlığını göstərə bilər.

- Yeməkdən sonra belə keçməyən aclıq hissi insulin mübadiləsinin pozulması və ya qalxanabənzər vəz problemləri ilə əlaqəli ola bilər.

- Duza qarşı güclü ehtiyac böyrəküstü vəzilərin fəaliyyətində pozuntuya və ya xroniki yorğunluğa işarə edir.

Bu cür siqnalları vaxtında tanımaq qidalanmanı düzgün tənzimləməyə, həkimə gecikmədən müraciət etməyə və sağlamlığı ciddi tibbi müdaxilələr olmadan qorumağa imkan verir. Orqanizmin dili var - onu dinləmək kifayətdir.