"İsrail Türkiyə üçün bir nömrəli təhlükədir" - Ərdoğan

"İsrailin Türkiyəyə qarşı gizli planları Ankarada ciddi narahatlıq doğurur..."

Türkiyə mətbuatı İsrailin Yunanıstan və Kiprlə birlikdə Qüdsdə keçirdiyi üçtərəfli sammiti Ankaraya qarşı yönəlmiş açıq mesaj kimi qiymətləndirir.

Moderator.az xəbər verir ki, bu barədə "Yeni Şafak" qəzeti yazıb.

İsrail "birinci risk" kimi dəyərləndirilir

Nəşr İsraili "Türkiyə üçün bir nömrəli təhlükə" adlandıraraq bildirir ki, Ankara bu yaxınlaşmanı regional balansı pozan və Türkiyəni kənarda qoymağa hesablanmış addım kimi görür. Qəzetin yazdığına görə, İsrail Suriyada kürd silahlı qruplarından istifadə etməklə Türkiyəni çətin vəziyyətdə qoymağa çalışır.

Türkiyə Müdafiə Nazirliyi, Xarici İşlər Nazirliyi və MİT kəşfiyyat qurumu artıq İsraili əsas strateji risk kimi gündəlik qiymətləndirmələrə daxil edib. Bu yanaşma Ankarada İsrailin bölgədə əhatələmə və təcridetmə planı apardığı qənaətini gücləndirir.

Qüds-Afina-Nikosiya xətti və gizli hərbi mesajlar

Qüdsdə keçirilən sammitdən sonra İsrail, Yunanıstan və Kipr təhlükəsizlik əməkdaşlığını gücləndirmək barədə razılığa gəlib. Baş nazir Benyamin Netanyahu isə dolayısı ilə Türkiyəyə ünvanlanan çıxışında "başqalarının torpaqlarına nəzarət etmək xəyallarının puça çıxacağını" bildirib. Bu bəyanat Ankarada birbaşa xəbərdarlıq kimi qəbul olunub.

Keçmiş israilli diplomat Alon Liel açıq şəkildə etiraf edir ki, Türkiyə bu yaxınlaşmanı aqressiv addım sayır və mümkün toqquşmalara hazırlaşır. Onun sözlərinə görə, tərəflər birbaşa müharibəyə getməsə də, ilk təhlükəli insidentlər Suriyada baş verə bilər. Bu da İsrailin Türkiyə ilə dolayı qarşıdurmanı üçüncü ölkələr üzərindən aparmaq niyyətini göstərir.

Qəzza planı və Ankaranı kənarda saxlamaq cəhdi

Bu fonda ABŞ İsraili Qəzza üzrə sülh planına sadiq qalmağa və ərəb ölkələrini qıcıqlandırmamağa çağırsa da, Təl-Əviv Türkiyənin Qəzzanın bərpasında iştirakına qəti şəkildə qarşı çıxır. Vaşinqton Ankaranın beynəlxalq sabitləşdirmə qüvvələrində rol almasını istəsə də, İsrail siyasi mənbələri "Türkiyənin bu prosesdə yer almayacağını" açıq bildirir.

Türkiyə xarici işlər naziri Hakan Fidan isə İsrailin atəşkəsi pozmasının Qəzza planını iflic etdiyini vurğulayır və Ankaranın əsas şərtlərini xatırladır: Qəzza fələstinlilər tərəfindən idarə olunmalı, bölünməməli və bütün layihələr yalnız yerli əhali üçün həyata keçirilməlidir.

Yekun mənzərə

Ortaya çıxan tablo göstərir ki, İsrail bir tərəfdən Qəzza üzərindən diplomatik manevrlər edir, digər tərəfdən isə Yunanıstan və Kiprlə qurduğu alyans vasitəsilə Türkiyəni regional oyundan sıxışdırmağa çalışır. Ankara isə bu xətti artıq gizli plan deyil, açıq təhlükə kimi dəyərləndirir. Gərginlik səngiməzsə, İsrail-Türkiyə qarşıdurmasının dolayı və lokal cəbhələrdə kəskinləşməsi istisna edilmir.