"Amerikalılar yadplanetlilərin Yerə gəldiyinə getdikcə daha çox inanır" - "Wired Magazine" (ABŞ)

"Rəsmi açıqlamalar, populyar mədəniyyət və sosial şəbəkələr inamı necə gücləndirir..."

ABŞ-da yadplanetlilərin Yer kürəsini ziyarət etdiyinə inananların sayı son illərdə davamlı şəkildə artır. 

Moderator.az xəbər verir ki, bu barədə ABŞ-ın "Wired Magazine" nəşri yazıb.

İnamın artan dinamikası

Nəşr yazır ki, buna əsas səbəblərdən biri ABŞ hökumətinin və aparıcı media qurumlarının naməlum uçan obyektlər (UNO) mövzusunu artıq açıq və ciddi şəkildə müzakirə etməsidir. Sosial şəbəkələr və kütləvi mədəniyyət də bu marağı gücləndirir.

Sorğular nə göstərir?

2025-ci ilin noyabrında "YouGov"-un keçirdiyi sorğuya əsasən, amerikalıların 47 faizi yadplanetlilərin "dəqiq" və ya :böyük ehtimalla" Yerə gəldiyini düşünür. 2012-ci ildə bu göstərici 36 faiz idi. Eyni zamanda tərəddüd edənlərin payı 48 faizdən 16 faizə enib. Bununla yanaşı, skeptiklərin sayı da artıb - hazırda respondentlərin 37 faizi yadplanetli ziyarətlərinə inanmır.

Rəsmi diskurs və populyar mədəniyyətin rolu

Ekspertlər dəyişiklikləri əsasən 2017-ci ildən sonra başlayan institusional dönüşlə əlaqələndirir. "The New York Times"ın Pentaqon videolarını yayımlaması, Konqres dinləmələri və NASA-nın araşdırmaları mövzunu legitim müzakirə predmetinə çevirib. Son illərdə çəkilən sənədli filmlər və keçmiş hərbçilərin açıqlamaları da bu təsiri artırıb.

Bununla paralel olaraq, filmlər və seriallar - "Supermen", "Fantastik dördlük", "Ulduz yolu" və digərləri yadplanetliləri kütləvi mədəniyyətin mərkəzinə gətirib. Tədqiqatçılar hesab edir ki, bədii obrazlarla rəsmi açıqlamaların üst-üstə düşməsi insanların düşüncəsində "reallıq effekti" yaradır.

Marjinal mövzudan normallaşmaya

Bir vaxtlar marjinal sayılan bu inanc indi daha geniş qəbul olunur. Maraqlıdır ki, yadplanetlilər mövzusu ABŞ-da nadir hallardandır ki, demokratlar və respublikaçılar arasında ciddi parçalanma yaratmır. Sorğuya görə, demokratların 51 faizi, müstəqillərin 49 faizi və respublikaçıların 42 faizi yadplanetli ziyarətlərini mümkün sayır.

Gələcəyə baxış

Ekspertlərin fikrincə, sosial şəbəkələr və tematik icmalar bu inamın yayılmasında mühüm rol oynayır. Bəzi alimlər kəskin dönüş görməsə də, digərləri hesab edir ki, yadplanetlilərin Yerə gəldiyinə inanan amerikalıların sayı yaxın illərdə artmaqda davam edəcək və bu, reallığın dərk edilməsinin yeni forması kimi qəbul olunacaq.