Türk alimdən dünya elminə mühüm töhfə: ağciyər xərçəngi üzrə yeni dərman açıqlandı

Moderator.az xəbər verir ki, türk əsilli alim Gizem Karslı Uzunbaş ABŞ-da aparılan onkoloji tədqiqatlar sahəsində mühüm elmi uğura imza atıb.

Alimin Massachusetts Institute of Technology (MIT) və Harvard University ilə birgə fəaliyyət göstərən Broad Institute-da çalışdığı elmi qrupun ağciyər xərçəngi üçün hazırladığı yeni dərman namizədi U.S. Food and Drug Administration (FDA) tərəfindən rəsmi mərhələlərdən birinə qəbul edilib.

Məlumata görə, Gizem Karslı Uzunbaş və komandası son 6 il ərzində ağciyər xərçənginin müəyyən genetik mexanizmlərini hədəfləyən innovativ molekul üzərində sistemli tədqiqatlar aparıb. Araşdırmalar xərçəng hüceyrələrinin çoxalmasında və davamlılığında rol oynayan spesifik siqnal yollarının bloklanmasına yönəlib. Elmi yanaşma klassik kimyaterapiyadan fərqli olaraq daha hədəfli və potensial olaraq daha az yan təsirli müalicə modelinə əsaslanır.

Ekspertlərin vurğuladığı əsas məqam ondan ibarətdir ki, bu mərhələ dərmanın geniş istifadəsi üçün yekun FDA təsdiqi anlamına gəlmir. Söhbət dərmanın klinik sınaqlara buraxılması, təhlükəsizlik və effektivliyin qiymətləndirildiyi erkən mərhələlərdən keçməsindən gedir. Bununla belə, bu status dərman namizədinin elmi baxımdan ciddi potensiala malik olduğunu və beynəlxalq tənzimləyici qurumlar tərəfindən ciddiyə alındığını göstərir. 

Qeyd edək ki, Broad İnstitutu dünyada xərçəng genetikası, molekulyar biologiya və fərdiləşdirilmiş tibb sahəsində aparıcı elmi mərkəzlərdən biri hesab olunur. Burada əldə edilən nəticələr çox vaxt gələcək onkoloji müalicə protokollarının formalaşmasına birbaşa təsir edir. Gizem Karslı Uzunbaşın iştirak etdiyi layihə də məhz genetik hədəfləmə və yeni nəsil dərman dizaynı üzərində qurulub.

Beynəlxalq elmi ictimaiyyətdə bu nailiyyət türk əsilli alimlərin ABŞ elmi mühitində artan rolunun, eləcə də qadın alimlərin biotibb və onkologiya sahəsində yüksələn mövqeyinin növbəti göstəricisi kimi dəyərləndirilir. Mütəxəssislər bildirirlər ki, klinik sınaqların növbəti mərhələlərinin uğurla tamamlanacağı təqdirdə, bu dərman bir neçə il ərzində ağciyər xərçəngi müalicəsində real alternativlərdən birinə çevrilə bilər. /Musavat.com/