"Vladimir Putinlə "birbaşa xətt - 2025": ilk saatın əsas mesajları" - Rusiya mətbuatı

"Birinci saatda diqqətçəkən məqamlar..."

Dekabrın 19-da Rusiya prezidenti Vladimir Putin ənənəvi "İlin yekunları" proqramı çərçivəsində vətəndaşların suallarını cavablandırıb.

Moderator.az xəbər verir ki, bu barədə "ura.news" nəşri məlumat yayıb.

Cəbhə və "xüsusi əməliyyat" barədə açıqlamalar

İlk saatda əsas mövzulardan biri müharibə olub. Putin bildirib ki, Kursk istiqamətində vəziyyət dəyişdikdən sonra cəbhədə təşəbbüs tam şəkildə Rusiya Silahlı Qüvvələrinin əlindədir. Onun sözlərinə görə, hücumlar bütün təmas xətti boyunca davam edir, Ukrayna qüvvələrinin isə strateji ehtiyatları demək olar ki, tükənib.

Putin qeyd edib ki, hazırda Kiyev tərəfindən real danışıqlara hazır olma əlamətləri zəifdir, amma müəyyən "siqnallar" müşahidə olunur. Bununla belə, o, münaqişənin sülh yolu ilə başa çatdırılmasının Moskva üçün hələ də prioritet olduğunu vurğulayıb və 2025-ci ilin sonunadək yeni hərbi uğurlar gözlədiyini deyib.

Cəbhədə vəziyyət: şəhərlər və istiqamətlər

Putinin sözlərinə görə, vəziyyət gündəlik dəyişir. O, Krasnı Limanın ərazisinin təxminən yarısının artıq Rusiya nəzarətində olduğunu, eyni vəziyyətin Konstantinovka üçün də keçərli sayıldığını bildirib. Slavyansk-Kramatorsk-Konstantinovka aqlomerasiyası əsas möhkəmləndirilmiş zona kimi göstərilib.

Prezident Zaporojiye istiqamətində "Vostok" qoşun qruplaşmasının irəlilədiyini, Sumı istiqamətində isə "təhlükəsizlik zonaları"nın yaradıldığını deyib. Onun açıqlamasına görə, Volçansk nəzarətə götürülüb, Kupyansk azad edilib və əsas hədəf indi qovşaq stansiyasıdır. Putinin iddiasına əsasən, Seversk də artıq Rusiya qüvvələrinin nəzarətinə keçib və bu, Slavyansk istiqamətinə yol açır.

İqtisadiyyat, elm və beynəlxalq mövqelər

Putin bildirib ki, 2025-ci ildə Rusiya iqtisadiyyatı 1 faiz artım göstərib, son üç ildə ümumi artım isə 9,7 faizə çatıb. İnflyasiyanın ilin sonunda 5,7-5,8 faiz səviyyəsində olacağı, işsizliyin isə 2,2 faizə düşdüyü açıqlanıb. Beynəlxalq ehtiyatların həcmi 741,5 milyard dollar səviyyəsində qiymətləndirilib və dövlət borcunun ÜDM-ə nisbəti 17-18 faiz civarındadır.

Elm sahəsində Putin Sibir Halqa Foton Mənbəyinin (SKİF) işə salınmasını mühüm nailiyyət adlandırıb, gənc mütəxəssislərin saxlanılması üçün maaş, mənzil və müasir laboratoriyaların vacibliyini vurğulayıb. Avropada Rusiya aktivlərinin müsadirəsi məsələsinə toxunan Putin isə bunu "oğurluq yox, açıq-aşkar qarət" kimi xarakterizə edib və belə addımların avrozonaya etimadı sarsıdacağını bildirib.