"Qərbin təzyiqi olmadan müharibəni dayandırmaq mümkün deyil" - Zelenski

"Əgər Avropa İttifaqı Kiyevin maliyyə ehtiyaclarını qarşılamasa, Avropa "öz qanı ilə" ödəmək məcburiyyətində qalacaq..."

Ukrayna prezidenti Vladimir Zelenski Rusiyanın müharibəni davam etdirmə qabiliyyətinin artıq yalnız Kremlə deyil, Qərbin, xüsusilə də ABŞ və Avropanın atacağı addımlara bağlı olduğunu bildirib.

Moderator.az xəbər verir ki, bu barədə "oboz.ua" nəşri məlumat yayıb.

Məlumatda deyilir ki,  Zelenski bunu Brüssel və onlayn brifinqlər zamanı səsləndirib. Prezident vurğulayıb ki, Rusiya lideri Vladimir Putinin son hədələri və açıqlamaları Kiyev üçün yenilik deyil. "Putin müharibəni bitirmək istəmir. Məsələ ondadır ki, onu davam etdirə biləcəkmi? Bu isə artıq tərəfdaşlarımızdan - sanksiyaların real təsirindən və diplomatik təzyiqdən asılıdır", -  Zelenski bildirib.

Qərbin qərarları və Ukraynanın davam gətirmə həddi

Zelenski qeyd edib ki, bəzi amerikalı siyasətçilər Putinin guya müharibəni bitirməyə hazır olduğunu iddia etsələr də, Ukrayna bu bəyanatlara ehtiyatla yanaşır. Onun sözlərinə görə, Kiyev ABŞ-ın təşəbbüslərini dəstəkləsə də, mümkün sülh razılaşmalarında bir sıra ciddi fikir ayrılıqları qalır. Bu fərqlər ərazi məsələləri, maliyyələşmə, eləcə də Rusiyanın dondurulmuş aktivləri ilə bağlıdır.

Ukrayna lideri açıq şəkildə xəbərdarlıq edib ki, əgər Avropa İttifaqı növbəti il üçün Kiyevin maliyyə ehtiyaclarını qarşılamasa, Ukrayna "davam gətirməyə bilər". Bu halda Avropa artıq pulla deyil, "öz qanı ilə" ödəmək məcburiyyətində qalacaq. Zelenskinin sözlərinə görə, Rusiyadan gələn siqnallar sülhdən yox, daha geniş təhlükədən xəbər verir.

Eyni zamanda o bildirib ki, əgər yaz aylarında Ukrayna maliyyə tranşı almasa, ölkə daxilində dron istehsalı kəskin azalacaq, uzaqmənzilli zərbələr isə faktiki olaraq mümkünsüz olacaq. Bu isə Rusiyanın enerji resurslarına qarşı aparılan təzyiqi zəiflədəcək.

Təhlükəsizlik zəmanətləri və müharibənin gələcəyi

Zelenski Ukrayna üçün əsas təhlükəsizlik zəmanətlərini də açıqlayıb. Onun sözlərinə görə, bu zəmanətlər ABŞ Konqresi tərəfindən təsdiqlənməli, hüquqi cəhətdən məcburi olmalı və NATO-nun 5-ci maddəsinə bənzər mexanizmi əhatə etməlidir. Bundan başqa, Ukrayna ordusunun sayı 800 mindən az olmamalıdır.

Prezident əlavə edib ki, hazırda Ukrayna ilə Rusiya arasında razılaşdırılmış yekun sülh planı mövcud deyil. ABŞ müəyyən variantları həm Kiyevlə, həm də Moskva ilə müzakirə edir, lakin ortaq mətn hələ formalaşmayıb.

Analitiklərin fikrincə, Rusiya Ukraynanın ərazi bütövlüyünü və real təhlükəsizlik zəmanətlərini nəzərdə tutan istənilən sülh razılaşmasına razı olmayacaq. Bu isə müharibənin taleyinin hələ də Qərbin siyasi iradəsindən asılı olduğunu göstərir.